Amazwe emhlabeni jikelele aselinde ukuzamazama kwezomnotho nanku osezakuba nguMongameli weMelika uMnu Donald Trump uthi uzakwethesa amazwe imithelo ebanzi, ikakhulu eleChina.
Ukungazi ukuba uTrump uzakwenzani kahle-kahle sokutshiye ohulumende labosomabhizimusi bedidekile.
Embusweni wakhe wakuqala uDonald Trump wethesa impahla evela kweleChina imithelo ephezulu kakhulu, okwaphehla ukungahlaliseki kumnotho womhlaba jikelele.
Phambilini kokuphenduka kwakhe kumbuso wesibili, uTrump uyafunga uthi khathesi uzathatha amanyathelo aqinileyo ekhweze imithelo yempahla engena kweleMelika ivela kwamanye amazwe ngokulitshumi ekhulwini, 10 percent, kuthi evela kweleChina yona uzayikhuphula ngokungamatshumi ayisithupha ekhulwini, 60 percent.
Lanxa eleChina lingakaphawuli lutho ngokukhulunywa nguTrump, selike laxwayisa ngokufuthelana kwezokuthengiselana Phakathi kwamazwe womabili.
"Asiphenduli imibuzo yokucabangela. Kodwa ngizaphinda ngigcizelele ukuthi akekho ophumelelayo empini yokuthengiselana, futhi lomhlaba awungeke uzuze luthi kulimpi,” kutsho isikhulumeli sogatsha lukahulumende weChina olubona ngokudlelana lamanye amazwe uNkosikazi Mao Mao Ning.
Imithelo kaTrump ilakho ukulimaza iminotho yamazwe athengisela eleMelika impahla, kodwa ukwethesana imithelo kwalelilizwe leChina kulakho ukuvulela abanye amathuba.
Amazwe amanengi athole inzuzo ngoba ukukhiqizwa kwempahla kusuke kweleChina ngenjongo yokubalekela imithelo.
Umphathintambo wakweleThailand obona ngenhlelo zokuthengiselana uMnu Pichai Naripthaphan utshele umsakazo weVoice of America ukuthi amankampani amanengi aseMelika asevule amabhizimusi elizweni lakhe esuka kweleChina.
“Kufanele sikwazi ukumelana lesimo lesi. Empeleni ngibona inkinga lezi zilethela eleThailand inzuzo. Ngikholwa ukuthi singaba yindawo yokutshala imali yawo wonke amazwe,” kutsho uNaripthaphan.
Kodwa leyondlela iza lengozi. Amazwe amanengi athole inzuzo ngokusuka kwenhlelo zokuthengiselana ezinengi kweleChina asegxile ekuthengiseleni impahla yawo eMelika, okuwafaka engozini yokwetheswa imithelo ekhulunywa nguTrump.
Ukukhathazeka akukho emazweni alobudlelwano bokuthengiselana leMelika kuphela.
EAfrica, lapho ukuthengiselana leMelika okokusilinganiso esiphansi, imithelo ingadala ukuthi kube lokuswelakala kwezinye impahla, ngokutsho kukaMnu Melvin Foote, ingcwethi ekhokhela inhlanganiso yeConstituency for Africa, ekhuluma leVOA Africa 54.
Uthe, “Nxa sikhuluma ngokukhiqiza impahla, kuzaba nzima ukuthi izithelo ezifana lama-pineapples zingene kweleMelika. Ngakho, angilathemba ngokuthengiselana phakathi kweAfrica leMelika nxa sikhangela ukukhutshulwa kwemithelo.”
Ukungacaci okunengi kuvelela ekuthini uTrump ngumuntu ongeke umqedisise. Eze engene embusweni kuqala, wayehlala esebenzisa imithelo ukwethusela ukuze ethole akufunayo, kutsho ingcwethi esebenza lenhlanganiso yeInstitute of Southeast Asia Studies uMnu Jayant Menon.
“Angicabangi ukuthi uTrump ungumvikeli, ungusomabhizimusi. Yiyo indlela athanda ukuzichaza ngayo. Uthanda izivumelwano zokuthengiselana aphatheke kuzo,” kutsho uMnu Menon.
UMenon uthi amazwe aqotshwe nguTrump alakho ukupphoqa ukulotshelwana kwezivumelwano ezintsha endaweni yokwethesana imithelo, okungawalimaza kanye lomnotho womhlaba.
Ayisikho konke okukhulunywa nguTrump okukhomba ukuthi ufuna ukunqaba ukuthengiselana lamanye amazwe.
Useke wakhuluma ngokwesula imali evela kuhulumende eyokuphathisa amankampani akhiqiza izimota ezisebenza ngamandla kagetsi. Loluncedo lwasungulwa nguhulumende kaMongameli Joe Biden.
UMelon uthi, “UTrump uchothoze uncedo lolu ku-podcast kaJoe Rogan uTrump. Ngakho ulakho ukulwesula. Ngibona lokhu kuyinto enhle ikakhulu nxa sikhangela inkinga ezithinta umnotho womhlaba.”
Ngesikhathi amazwe omhlaba eqhoba amathambo engqondo ekuthini azasebenza njani loTrump, amathuba amahle akhona kanye lengozi kunhlelo zokuthengiselana.
Udaba lolu lulotshwe nguBill Gallo weVOA News, eseSeoul, kweleSouth Korea, lwahumutshwa yimi uNtungamili Nkomo weVOA Studio 7.
Forum