Umanyano weEuropean Union uthi usuvala amanye amahofisi awo aqhuba inhlelo zentuthuko emhlabeni jikelele, okulinyathelo elibikwa lilakho ukuphazamisa izigidi zabantu emazweni aseAfrica agoqela eZimbabwe.
Inhlanganiso ezizimeleyo ezinengi zithola imali yokuqhuba inhlelo zazo emazweni aphetsheya afana lalawo aseEurope, eMelika lamanye atshiyeneyo.
Sikhuluma-nje ezinengi zalezinhlanganiso sezivaliwe eZimbabwe ngemva kokumiswa kosizo lwemali ebivela kuhulumende wakweleMelika nguMongameli Donald Trump.
EleNetherlands lalo lithi lizakwehlisa imali yentuthuko ebeliyipha amazwe atshiyeneyo.
Ukunciphiswa kosizo lwamazwe aphetsheya lokhu kubikwa sokuphuce abantu abanengi imisebenzi njalo abanye bathi kuzagxilisa lobuyanga.
Kodwa umkhokheli wenhlanganiso elwela amalungelo oluntu eyeMatabeleland Institute for Human Rights uMnu Khumbulani Maphosa okwenzakalayo lokhu kuveza sobala ukuthi abazwe aseAfrica kumele azimele.
Forum