Umongalemi Ian Khama weleBotswana usethule umlayo wokuthi kukhangelisiswe kakutsha ukunikezwa kwamaphepha okusebenza kweleBotswana, ama work permits, ngesikhathi inengi, ikakhulu elivela eZimbabwe, likhonona ngokuphuza ukuthola kumbe ukuncitshwa kwencwadi lezi.
Ugatsha olubona ngezisebenzi lubambe umhlangano wokulalela izikhalazo zabaqatshi abakhonona kakhulu ngokuphuza kumbe ukungaphiwa kwencwadi zokusebenza kwalabo abavela kwamanye amazwe.
AbeZimbabwe abazinkulungwane phose eziyisithupha, abangaba yisilinganiso sokungamatshumi phose amane ekhulwini kunani labobonke abavela kwamanye amazwe, basebenza okusemthethweni eBotswana.
Kodwa esikhathini esisanda kwedlula, inengi seliqale ukukhonona ngokuphuza ukuthola amaphepha, kukanti kwezinye izikhathi, abanye bayancitshwa besithi abaphiwa izizatho ezisuthisayo.
Emhlanganweni obanjelwe eGaborone, ugatsha olumela amabhizimusi, iBusiness Botswana ithi kumele kuhluzwe indlela okuphiwa ngayo incwadi lezi. IBusiness Botswaan ithi ikhathazekile ngokuphuza kumbe ukuqhubeka kokuncitshwa lezi ncwadi okulakho ukulimaza ukungena kwabafuna ukuzovula amabhizimusi.
Umhlangano lo ube zindaba ezimnandi kwabeZimbabwe abakade bekhala ngesiphatho uma bedinga incwadi zokusebenza besithi bancitshwa kungalasizatho.
Umnumzana James Ndlovu ukwamukele ngenjabulo ukungenela kukamongameli Khama ethi bakhangelele inguquko kusiya phambili.
Umnumzana Dumi Ndaba uthi yena ubeselahle ithemba ngoba inengi labanye bakhe seliphindele eZimbabwe ngenxa yokuncitshwa umsebenzi kodwa umhlangano osanda kubakhona ubanikeza ithemba.
Kukanti ongumbalisi umnumzana Gracious Simulumbu uthi kunzima ukuthola incwadi okwenza ukuthi abanye bacine besebenza bengalazo. Laye wamukele inyathelo likahulumende weBotswana.
Noma nje kulenani eliphose libe yinkulungwane eziyisithupha abeZimbabwe abasebenza eBotswana belencwadi eziqondileyo, kucatshangelwa ukuthi inani leli liphezulu kulalokhu ngoba kulabanye abasebenza okungekho emthethweni, ngenxa yokuncitshwa lezincwadi.