Inhlanganizo ezilwela ilungelo lamatitshala kunye lozulu mathupha sesole inyathelo elifuna ukuthathwa nguhulumende elokuquma iholo lababalisi ezikolo ezingasoze zibe labantwana abedlula isilinganiso sokungamatshumi amahlanu ekhulwini abayabe bepasile ezifundweni zabo.
Lesi sinqumo sethulwa ngumphathintambo wezemali, uMnu. Patrick Chinamasa esethula uluhlu lwendleko zikahulumende, ibudget eyomnyaka lo.
Phansi kwalelinyathelo izikolo ezizaba labantwana abaphansi kwesilinganiso lesi ababalisi kabasoze bathole iholo labo lenyanga lapho izikolo eziyabe zivaliwe.
UChinamasa uthi lokhu kuzenza uhulumende alondoloze imali engaba yisilinganiso eingamatshumi ayiskhombisa, 70 percent.
Izilinganiso zokupasa zikhomba ukuba izikolo zesigaba seMandebeleni yizo ezilabantwana abangaphumeleli ezifundweni zabo minyaka yonke.
Owake waba ngumphathintambo wezemfundo, uMnu. David Coltart utshele iStudio Seven ukuthi lelinyathelo kalilunganga ngoba lizancendezela lababalisi abenza kuhle emsebenzini wabo.
Omela inhlanganiso ye Progressive Teacher’s Union ko Bulawayo, uMnu. Vusumuzi Mahlangu utshele uChris Gande weStudio Seven ukuthi inyathelo likahulumende leli kalisoze liyamukelwe ngamatitshala njalo nxa lingaphumelela lizatshiya izikolo ezinengi zingela babalisi ngoba bazakuya kwamanye amazwe.
"Lokho nxa kuliqiniso kuyinto engamukelekiyo ngitsho kithi abezemfundo ngoba siyakunanzelela ukuthi ukuze umntwana aze aphumelele ezifundweni zakhe kudingakala izinto ezinengi kakhulu," kutsho uMahlangu.
UMahlangu uthi ukuze umntwana aphumelele lombalisi aphiwe umlandu wokungamfundisanga kahle kumele lokhu okudingakalayo kuqale kulungisiswe.
