Amapholisa Avimba Umhlangano weMDC

WASHINGTON DC —  Amapholisa eLupane avimbe iMDC ekhokhelwa nguMnu Welshman Ncube ukwenza umhlangano kulesisigaba ngoMvulo, okuyinto esolwe kakhulu yilelibandla.

NgeSonto, iMDC ibilomhlangano wokudinga usekelo ngaphambilini kokhetho eTsholotsho, njalo ngoMvulo ibimele iqhube omunye eLupane East.

Kodwa lelibandla lithi amapholisa alivimbile ukuqhubekela phambili ngalumhlangano esithi ayabe elondoloza ukuthula emhlanganweni kaMongameli Robert Mugabe eVictorial Falls.

Ngalokho, athe akulamapholisa angabakhona eLupane ukuze alondoloze ukuthula emhlanganweni weMDC.

Ibandla likaNcube selibhode ngendawo ezinengi zelizwe likhulumisana labasekeli njalo lichasisa inhlelo elizavuselela ngazo ilizwe nxa lithe langena embusweni.

Isikhulumeli seMDC uMnu Nhlanhla Dube usole kakhulu amapholisa esithi asetshenzisiwa yiZanu PF ukuvimba imihlangano yebandla lakhe ngoba liqhubeka ngokuthola usekelo elizweni jikelele.

Ngempelaviki, amapholisa eMashonaland West abikwa evimbe ibandla likaMnu Simba Makoni, iMavambo/Kusile/Dawn ukwenza umhlangano walo.

Amapholisa endaweni ezitshiyeneyo zelizwe ahlezi evimba imihlangano yamacele womabili eMDC lamanye aphikisana leleZanu PF, kodwa lelibandla lona alikaze lalelwe.

Lokhu sokubangele ukuthi inengi lethese amapholisa umlandu wokusekela uMongameli Robert Mugabe lebandla lakhe leZanu PF.