Amapholisa ngoMgqibelo ale ukupha imvumo inhlanganiso yezisbenzi eye Zimbabwe Congress of Trade Unions ukuthi itshengisele kodwa emadolobheni aphiwe imvumo bebebalutshwana abaphatheke kulokukutshengisela kade kuqoqwe phezu kodaba lokuxotshwa mahlayna okwenziwa izisebenzi.
Unobhala jikelele wenhlanganiso yeZCTU uMnu. Japhet Moyo utshele i Studio Seven ukuthi amapholisa abaphe izizatho ezimbalwa ezigoqela esokuthi besabela ukuthi ukutshengisela lokhu kungacina kuthathwa yizigilamkhuba abangafunanga ukuzibetha ngamagama lanxa bethe bayazazi.
“Zimbalwa izizatho abazethulileyo okwenze lathi singazathanda ukuqhubekela phambili ngohlelo lwethu. Kwezinye indawo kuphumelele loku kutshengisela,” kutsho uMoyo.
Wengezelele esithi edolobheni le Chinhoyi lako akuzange kube lokutshengisela ngoba kulombuthano weziphathamandla zikahulumende.
Ko Bulawayo umgcinisihlalo weZCTU Western region uMnu. Ambrose Sibindi utshele iStudio Seven ukuthi balokuthaba ngoba abantu baze ngobunengi lanxa indawan yonke ibigcwele amapholisa ahlome ngimibhobho.
USibindi uthe ubona ingani inani labantu abaphatheke ekutshengiseleni lokhu bengedlula kumbe ukufika kunnkulugwane eyodwa lamakhulu angamatshumi amahlanu, i1 500.
“Ezinye izisebenzi kazibuyanga ekutshengiseleni lokhu ngoba zisazi ukuba lezinsuku kulula kakhulu ukuxotshwa umsbnenzi,” kutsho uSibindi.
Sekulezisebenzi eziyikulugnwane ezifika phose amatshumi amabili, i 18 000 esezixotshiwe emebenzini kulandela isinqumo sedale le Supreme Court ngenyanga edluleyo eyathi abaqatshi balelungelo lokuxotsha izisebenzi nxa ziphiwe isaziso senyang ezintathu zingaphiwanga impentsheni.
Ukuxotshwa kwezisebenzi lokhu kufinyelele inkampani yamaphephandaba eye Zimpapers ngoMgqibelo lapho okuxotshwe izisebenzi ezifika ikhulu ezibalisa intathelizindaba. IZimpapers idinda amaphepaha agoqela i The Herald, The Chronicle lamanye.