Amapholisa athi adinga intathelizindaba yephephandaba elizimeleyo eleNewsDay uBlessed Mhlanga odume kakhulu kulezinsuku ngengxoxo zakhe lowalwa impi yenkululeko uMnu Blessed Geza, laye odingwa ngamapholisa amethesa amacala abalisa elokuthuka uMongameli Emmerson Mnangagwa, elokuphehla udlakela kanye lelokuntshontsha.
Isikhulumeli samapholisa uMnu Paul Nyathi wethule umbiko ngoLwesihlanu esithi uMhlanga wephula isigaba 164 somthetho weCriminal Law (Codification and Reform) Act, isahluko 9:23.
Lanxa uNyathi engachasisanga ukuthi kahle-kahle uMhlanga wenzani, ingxenye yomthetho lo iphathelane lokutshotshozela udlakela.
UMhlanga yena wethule umbiko enkundleni yeX esithi ukhulumisane loNyathi wamazisa ukuthi uzakuya emapholiseni ngoMvulo ngoba okwamanje akezwa kuhle emzimbeni.
Iphephandaba leNewsDay lithi isiphathamandla senkampani yalo eyeAlpha Media Holdings uMnu Kenias Mafukidze laye ubizwe ngamapholisa.
UMhlanga uqhube ingxoxo loGeza ezilokhe zisemilonyeni yabantu abanengi kunsukwana ezedluleyo lapho uGeza aveze ukuthi yena labanye abalwa impi yenkululeko abangamalunga ebandla leZanu PF abafuni kuzwa ngokuqheliswa kombuso kaMnangagwa, esithi bafuna asuke khathesi esikhundleni ngoba ekhohlakele.
UMhlanga uthi useke wabizwa ngamapholisa kabili wayazinikela enkambeni yawo kodwa kazange etheswe icala.
NgoLwesine amapholisa anqolonge uNkosikazi kaGeza ambuzisisa ngokuthi ungaphi.
Umqondisi wenhlanganiso yabahleli bezindaba eyeZimbabwe National Editors Forum uMnu Njabulo Ncube utshele iStudio 7 ukuthi ukudingwa kukaMhlanga ngamapholisa yikumhlukuluza ngezombusazwe okusobala.
Forum