Inhlanganiso yezinkonzo eye Shalom Project ithi izacela umsekeli kamongameli, uMnu. Phelekezela Mphoko ukuba angenele edabeni labantu bepulazini le Cunningham abatshaywe kabuhlungu ngamapholisa besembuthanweni womthandazo.
UMphoko udabuka esigabeni se Matabeleland South lapho okule pulazi leli khona. Lelipulazi njalo liphathisa kakhulu izakhamizi zesigaba lesi ngendlela ezitshiyeneyo zokulima ezigoqela izingadi lokufuya inkomo.
NgoLwesibili amapholisa angenele abantu kade bethandaza esithi kabaphiwanga mvumo yokwenza lokhu phansi komthetho we POSA lanxa lumthetho ungabambi ngamandla abezinkolo ukuthi badinage imvumo.
Ezinye zezakhamizi lezi zibikwa zilimele kabuhlungu. Imizamo yokukhuluma lamapholisa esigaba yehlule. Kodwa uChris Gande weStudio Seven uxoxe lomfundisi Anglistone Sibanda omunye wabenhlanganiso ye Shalom Project ukuze sizwe okunengi ngaloludaba.
