Amakhulu ezizalwane zeZimbabwe ezafaka izicelo zokuthola amaphepha okuhlala okusemthethweni kweleSouth Africa aweZSP sebehlalele evalweni njengoba loluhlelo luvalwa ngoLwesithathu mhlaka 30 Mpandula 2015, bona bengakatholi amapermit abo.
Ugatsha lwendaba zasekhaya lwazise ukuthi loluhlelo luzavalwa ngokusemthethweni mhlaka 30 Mpandula, kodwa kusaselamakhulu abantu abalokhu bengakatholi amapermit abo, kanti labalezicelo ezaliwayo balokhu besemnyameni ngempumela yohlelo lokukhangelisiswa butsha kwalezo zicelo.
Ukuvalwa kohlelo lwama permit eZSP ngoLwesithathu mhlaka 30 Mpandula, 2015 sekubangele ukudana kakhulu kulabo abalokhe besalindele ukuphendulwa kwezicelo zabo zokuthola amapermit la.
Abanye balaba abakhathazekileyo yilabo abayingxenye yabedlula izinkulungwane ezilitshumi lambili, abancitshwa amapermit la kwasekuthiwa izicelo zabo zizakhangeliswa kabutsha.
Lobanje ugatsha lwendaba zasekhaya lungakethuli umbiko ocasisa ukuthi loluhlelo luzavalwa kanjani abantu belokhu belindele impendulo, ukungagcwaliswa kwesithembiso somphathintambo wogatsha lwendaba zasekhaya umnumnzana Malusi Gigaba, enkulumeni eyethula esazisa ngosuku lokuvalwa kwaloluhlelo ngenyanga ephelileyo, yikho osekutshiye inengi libambe owangaphansi.
Umnumnzana Methuseli Sibanda, uthi waba ngomunye wabakuqala ukuyafaka isicelo sepermit kodwa sekuze ku valwa elindile.
Umnumnzana Washy Mabizela yena eyakhe isiphumile kodwa ngeke ayithole kungakavalwa kusasa njengoba walahla iphasipoti. Uthi umcabango wokuthi kungenzeka kusasa kuthiwe uselizweni ngokungekho emthethweni usumtshiye efana lenhlanzi etshelwe ngamazi.
UMnumzana Sibanda yena uthi okulungileyo yikuthi ilanga lokuvala loluhlelo lidluliselwe phambili.
Ngenyanga ephelileyo ugatsha lwendaba zasekhaya lwakubeka kwacaca ukuthi, kuyathi kufika leli langa, ofake isicelo eseyitholile impendulo, izicelo ezaliwayo sezikhangelisisiwe, lwaselusithi wonke amapermit kuzafanele esekubaniniwo njengoba azabe engathathwanga ngeke esatholakala.
