Ibandla leCitizens Coalition for Change lithi intathelizindaba ezine ebezizothapha okwenzakala emhlanganweni weRally yalelibandla eGokwe Kabuyuni zihlaselwe ngoLwesine njalo zatshaywa ngabacatshangelwa ukuthi ngamalunga ebandla leZANU PF, abazame ukuvimbela umkhokheli walelibandla uMnu. Nelson Chamisa ukuthi akhulume kulumbuthano.
Eloba enkundleni yakhe ye Twitter, uNkosazana Fadzai Mahere, oyisikhulumeli seCCC uthe intathelizindaba lezi zibalisa uTongai Mwenje, Pellagia Mpurwa, Chelsea Mashayamombe, lo Toneo Mutsitso ophume izinyo kuloludlakela.
UNkosazana Mahere usole kakhulu lesisehlakalo esithi kwephulwa ilungelo loluntu kanye lesisekelo sombuso esivumela amabandla akuthi akhankase.
UMnu. Leo Munhende, isiphathamandla senhlanganiso elwela amalungelo entathelizindaba eyeYoung Journalists Association, uthi baphakathi kwemizamo yokuphathisa intathelizindaba lezi, njalo ezinye zazo ngamalunga alinhlanganiso.
Ekhuluma lomsakazo weStudio 7 ngoLwesithathu, obona ngokwethulwa kwembiko kulelibandla uMnu. Tafadwa Mugwadi uphikile ukuthi ibandla lakhe liyahlukuluza amalunga e-CCC wathi yiwo ahlukumeza abantu kanye lenkokheli zomdabu eGokwe.