Imidlalo yenkezo ye Chibuku Super Cup ingena kusigaba sama quarter - finals kulimpelaviki njalo imidlalo yakhona yonke idlalelwa esigodlweni iHarare ngoMgqibelo lange Sonto.
NgoMgqibelo iqembu le Chicken Inn lidlephana lele Chapungu sekuganxeme ihola lesibili emini kuthi ngemva kwalowo mdlalo kuzadibana amaqembu athi ele Triangle kanye lele Harare City sekusele imizuzu elitshumi lanhlanu ukaba kutshaye ihola lesihlanu emini yantambama.
Yomibili limidlalo izaqhutshelwa enkundleni ye National Sports Stadium okuyikho njalo okuzaqhutshelwa lemidlalo ezadlalwa ngeSonto.
Isikhathi sokuqala kwemidlalo yangoMgqibelo besihlelwe ukuba lihola lakuqala emini kodwa siguqulwe ngoba kuzakuba kulohlelo lokungcwatshwa kowayengumphathintambo kahulumende uSikhanyiso Ndlovu yena ozabekwa kusasa emathuneni eHeroes Acre.
NgeSonto iqembu le ZPC Kariba lizangqikilana lele How Mine ngehola lakuqala emini kuthi ngemva kwalowo mdlalo iqembu le FC Platinum lizadibana lele Dynamos sekuganxeme ihola lesithathu emini.
Ekhuluma phezu komdlalo weqembu lakhe lele Dynamos umqeqetshi weqembu le FC Platinum uNorman Mapeza uthe yena bazadlala njengemihla yonke.
......................................................................................
Kusenjalo intathelizindaba zemidlalo zithi isimo silakho ukwala silokhu simi lugege kwezemidlalo ngemva kokukhethwa njengomphathintambo wogatsha lwezemidlalo lokuzilibazisa kuka Makhosini Hlongwane.
Intathelizindaba esebenzela edolobheni lako Bulawayo uNation Ncube uthi uHlongwane imbali yakhe yokuphatheka kwezemidlalo phambilini kokukhethwa kwakhe kayaziwa ikanti kukhona abanye abangamalunga ephalamende abavele besaziwa ngokuphatheka kwezemidlalo etshiyeneyo.
.....................................................
UHlongwane ubeyintathelizindaba phambilini kokuba kwakhe lilunga lephalamende ikanti bakhona abafana lo Tabeth Kanengoni Malinga kanye lo Tapiwa Matangaidze abalembali eyaziwayo kwezemidlalo.
