Amagqwetha entathelizindaba yeAlpha Media Holdings uBlessed Mhlanga athi aphakathi kokulungiselela ukukhweza udaba lwakhe enkantolo yeHigh Court ephikisa isinqumo sikamantshi esokwala ukumkhulula ngemali yesibambiso, i-bail.
“Khathesi sisamelele amaphepha alemininingwane yamacala etheswa uMhlanga avela emthethwandaba kamantshi, okutsho ukuthi sizakuya eHigh Court ngoLwesibili kumbe ngoLwesithathu,” igqwetha likaMhlanga uMnu Chris Mhike utshele iStudio 7.
UMhlanga, osebenzela umsakazo kamabonakude oweHStv kanye lephephandaba leNewsDay ubotshwe ngeviki edluleyo ngoMvulo wetheswa amacala amabili okwethula imbiko ephehla udlakela kungxoxo azenza lelunga leZanu PF Central Committee uMnu Blessed Geza, yena okhokhela abalwa impi yenkululeko abathi bafuna uMongameli Emmerson Mnangagwa esuke embusweni ngoba esehlulekile.
Ukuncitshwa kukaMhlanga ithula lokuhlawula isibambiso se-bail ngumthethwandaba kamantshi ngoLwesihlanu ukuze ethonisiswe evela ngekhaya kusolwe zinhlanganiso zentathelizindaba kanye lesigodlo sommeli weMelika eZimbabwe.
Kumbiko esiwethule enkundleni yeX, isigodlo seMelika sithe phansi kwesisekelo sombuso weZimbabwe, intathelizindaba zilelungelo lokukhululwa ngemali ye-bail nxa zibotshiwe kanye lokukhuluma ezikufunayo zikhululekile.
Inhlanganiso ezilwela amalungelo entathelizindaba ezibalisa eyeCommitte to Protect Journalists leyeZimbabwe Union of Journalists (JUZ) lazo zethule imbiko zisola ukubotshwa kukaMhlanga.
“Le yinto ezasethusa, yinto ezakwethusa abanengi, kodwa sizaqina ngoba phela safunga sathi umsebenzi wokuba zintatheli yiwo kuphela esiwaziyo futhi yiwo esizaqhubeka siwenza,” kutsho unobhala jikelele weZUJ uMnu Perfect Hlongwane.
Amazwi kaHlongwane agzizelelwe ngumkhokheli wenhlanganiso yeYoung Journalists Association, uMnu Leo Munhende.
“Lathi sesisesaba," kutsho uMunhende. "Khathesi sokufuze ukuthi nxa sisebenza sicabange ukuthi umuntu laye engacina esevalelwe esitokisini njengoMhlanga. Siyakusola khakhulu lokhu.”
Umnininkampani weAlpha Media Holdings, yona elawula iphephandaba leNewsDay, eleStandard leleIndependent kanye lomsakazi weHSTV, uMnu Trevor Ncube usole ukuncitshwa kukaMhlanga i-bail esithi lokhu kuveza sobala ukuthi imithethwandaba yenza intando kaMnangagwa.
Kodwa unobhala kugatsha lukahulumende olubona ngokwethulwa kwemibiko uMnu Nick Mangwana ukulandule lokhu esithi, “Asikhulumi thina ngomuntu owumanayo.”
Ekwaleni ukukhulula uMhlanga inkantolo kamantshi ithe ukukhululwa kwakhe kulakho ukubangela ukungahlaliseki kumbe ukuphehle udlakela elizweni.
Ngaphandle kokuthi akhululwe yiHigh Court nxa amagqwetha akhe esefikise isicelo, uMhlanga uzaqhubeka evalelwe aphenduke enkantolo kamantshi mhlaka 14 kulinyanga.
Forum