Abatshayeli bezimota kanye labosomabhizimusi abakumsebenzi wokuthwalwa kwabantu lemphahla, bakhala ngokukhwezwa kwentengo yamafutha ezimota lapha athengiswa khona. Inengi lagalatshi athengisa amafutha la, abikwa esefuna ukuhlaulwa ngedola leMelika.
lntengo yamafutha ezimota okwamanje idlalela kumadola phose alikhulu RTGS$91 - $98 ilitha elilodwa kodwa emagalajini athengisa ngemali yeZimbabwe awasatholakali amafutha.
Ngedola leMelika ilitre ngayinye ithengiswa ngentengo ephezu kwedola elilodwa-$1.18 kusiya ku$1.20. Ukusetshenziswa kwemali yakwamanye amazwe sekutshiye inengi likazulu lilbhekane lobunzima ngoba intengo zakhona zingafani njalo inengi labathengi lingayiholi leyo mali yaphandle kwelizwe.
Umnunzana Effort Ncube ongumqondisi wenhlanganiso elwela amalungelo abathengi eye National Consumer Riaghts Association i(Nacora) uthi ukuthengisa amafutha ezimota ngemali yaphandle kwelizwe kutsho ukuthi balutshwane abazawafinyelela.
“Ukuthengiswa kwamafutha ezimota ngeforex kutsho khona ukuthi balutshwane abazayenelisa ukuthi bawathenge abazawathenga bayabe bethenga ngemali ephezulu ngokuba kuzamele baqale baguqule I bond benze foreign currency. Okwenza ukuthi nxa kungabe belamabhizimusi badulise izinto ukuthi babuye bayegcwalisa amafutha ezimota yibo ubunzima esihlangana labo khathesi emadolobheni lasemakhaya. Akululanga abantu bathwele gadalala ngoba leyo foreign currency ayitholakali itholakala kwabalutshwane.”
Umnunzana Mkhokheli Ndlovu oyisakhamuzi semzini wePumula koBulawayo uthi loluhlupho solubangela ezinye inhlupho.
“Ukuswelakala kwefuel kuya affect ibusiness ngendlela zokuthi akuhambeki lapha oyabe ufuna ukuyakhona ngoba kwesinye isikhathi kuyavuka kungela zimota kungela fuel khonokho kuyadala ukuthi kungasebenzeki kubusiness. Ukuthi uthele imota ifuel sokumele ubhode idolobho lonke so yikho okwenza kube nzima ngoba ama garage amanengi esethela ifuel ngeforex, thina iforex siyayithatha ngaphi sihola iRtgs.”
Unkosikazi Melisa Sithole ongusomabhizimusi wakoBulawayo uthi udubo lwamafutha ezimota asebizwa ngedola leMelika yilo olwenza ukuthi labo bakhweze intengo yabakuthengisayo.
“Ekuthengiseni lapha intengo zethu sizifaka ngokuthi sithenge malini njalo ukuthwala impahla zethu kubeyimalini, esikhathini esinengi ibond alisenzeli lutho ngoba ungaze ubelalo ifuel awuyitholi ucina uthenga iforex ukuze uthele ifuel ngakho kusuka kusiphambanise kakhulu ngoba sicina singatholi lutho okwenza ukuthi lathi sibesithengisa impahla zethu ngemali ephezulu nxa sithengisa ngibond ukuthi senelise ukuthenga iforex siphinde sithole okuncane lokhu sokusisebenzisa nzima kakhulu.”
Umnunzana Future Maphosa isakhamuzi seMagwegwe koBulawayo uthi izisebenzi zikahulumende zisebunzimeni ngoba zingatholi imali yakwamanye amazwe ikhakhulu idola leMelika.
“Uhlupho lwefuel ukuthi lufakwe ngeforeign currency lusekuthini ukuthi abantu abanengi bahola iRtgs sokhathesi ayisatholakali ifuel yeRtgs njalo sokunzima ukuthi abantu beyithole ngoba abasebenzela igovernment ama civil servants labo bahola ama bond so kunzima kakhulu ukuthi abantu bethole iforeign currency ukuthi bethenge ifuel osokuzenza abantu ukuthi abantu babele transport eyaneleyo.”
lnani lendawo okuthengisa khona amafutha ezimota ngedola leMelika asemanengi kulalawo athengisa ngeRTGS okuludubo oselwehlele osomabhizimusi abanengi behlaba omkhulu umkhosi kuthi labagada imitshova bethi sokunzima ukuthi baphile kusimo esinje sebesebenzela ukuhlawulela ukuya lokuphenduka emsebenzini.
Uhlangothi lukahulumende olubona ngokuthengiswa kwamafutha ezimota olwe Zimbabwe Energy Regulatory Authority lwanikeza amagalaji athengisa amafutha ezimota imvumo yokuthi bathengise amafutha ngemali yakwamanye amazwe. Umqondisi we ZERA wazise iphephandaba le Daily News ukuthi amagalaji alakho ukuthengisa ngemali yakwamanye amazwe ethi njalo intengo evunyelweyo iphakhathi kwamadola edlula kancane elilodwa leMelika- US$1.18 kusiya US$1.20.
