Ibandla leMDC-T leleMDC Renewal athi kasoze aphatheke kukhetho lwamaby-elections okudinga ummeli weMt Darwin West loweChirumanzu-Zibangwe edale lephalamende.
UMongameli Mugabe wazise ngempelaviki ukuthi ukhetho kulezizigaba luzakwenziwa Mhlanga 27 ngoMbimbitho.
IChirumanzu-Zibangwe isele ingela mmeli ngemva kokuba uMnu Emmerson Mnangagwa ekhethwe ukuba ngumsekeli kaMugabe.
ISigabe seMt Darwin laso sisele singelammeli ngemva kokukhethwa kukaNkosikazi Joice Mujuru kodwa akusazanga kwenziwa ukhetho kulesisigaba uMujuru waze waxotshwa.
Isikhulumeli seMDC Renewal uMnu Jacob Mafume uthi kabasoze bangene kulolukhetho ngoba kulezinto ezinengi ezingakalungisiswa ezigoqela uluhlu lwabantu abalelungelo lokuvota, iVoters roll.
La ngamazwi agcizelelwe ngumsekeli wesikhulumeli seMDC-T uNkosazana Thabitha Khumalo.
Kodwa isikhulumeli seMDC ekhokhelwa nguMnu Wlehsman Ncube uMnu Nhlanhla Dube uthi balesinqumo sokuthi bazangena kulolonke ukhetho olwenziwayo.
Ngalokho uthi bazangena lakulolukhetho nxa ibandla lingasaguqulanga isinqumo salo.