Ngesikhathi umongameli Robert Mugabe ekhokhela umhlangano we Politiburo webandla leZanu PF wokucina, kulamadoda amahlanu abikwa ebonakele ngoLwesibili esabela abantu eHarare amaphetshana alombiko okhuthaza ukususwa kwakhe esikhundleni akade elotshwe ukuthi “Vote of No Confidence Mugabe.” Amalunga eZanu PF asekhona lapho okwenzelwa umhlangano omkhulu owe Congress emba phansi esithi uMugabe nguye kuphela okumele abuse leli lizwe kuze kube naphakade.
Ababone lokhu kusenzakala bafakaze ukuba banikezwe amaphetshana wokukhankasela ukusuka kukaMugabe esikhundleni sobukhokheli la enikezwa uzulu we Harare, ngamadoda amahlanu abekade behamba ngemota ye Zanu PF ebilotshwe ukuba ngeyesigabeni se Mashonaland East.
Omunye walabo bafakazi, umnumzana Gilbert Kagodora, utshele iStudio Seven ukuba lokhu kwenzakale emini libalele, amadoda amabili la ehamba ngemota yohlobo lwe Nissan Hardbody bebhoda benikeza lamaphetshana edolobheni le Harare.
Lesi sehlakalo simangalise abantu inengi litshengisa ukuba kungaba yindlela esetshenziswa ngelinye lamacele elifuna ubukhokheli ukuphambanisa imibono lokuvoxa inqondo yabantu.
IStudio 7 ayenelisanga ukukhuluma labeZanu PF esigabeni seMashonaland East ngodaba lwamaphetshana la loba umgcinisihlalo webandla umnumzana Simon Khaya Moyo.
Omunye walabo onikeze umbono wakhe umnumzana Thabani Moyo oyisakhamuzi se Tynwald obesenzikini yedolobho ngesikhathi lokho kusenzakala ehamba ngomgwaqo u Jason Moyo laye ugcizelela ukuthi kungabe kuliqinga lelinye lamacele eZanu PF elibanga isikhundla.
UMoyo uthi lesi sehlakalo yisibonelo sokuba kulakho ukuba lomsindo kulomhlangano wesithupha we Congress yeZanu PF, oqale lamuhla endaweni ye Robert Mugabe Square eyake yabethwa ngelokhuthi yi Freedom Square ngabe bandla le MDC-T.
Umnumzana Tichaona Mhere ongomunye wabasekela ubukhokheli bukaMugabe, uthi bayaziyenga labo ababela amaphetshana la, ngoba kuyinto ezaphelela emaphutsheni abo njalo kuzaphelela emoyeni okufiswa ngabafuna uMugabe asuke esikhundleni sobukhokheli kungaba sebandleni loba kuhulumende. Uthi uMhere umongameli Mugabe nguye kuphela umkhokheli ozabusa kuze kube nini akekho ongamtshela ukuba asuke esihlalweni ngoba bemthanda.
Abanye asebekhona kulumhlangano wecongress bathi balethemba lokuthi uzaphuma lesinqumo ezizathuthukisa umnotho welizwe njengoba uphansi kwesihloko esithi “Acclerated Implementation of ZimAsset”. IZimAsset luhlelo lukahulumende lokuzama ukuthuthukisa umnotho welizwe.
Kunjalo nje umkamongameli uNkosikazi Grace Mugabe ubonakale esethekelela indawo ezakwenzelwa umhlangano weCongress njengoba engakakhethwa ukungena umhlangano wePolitburo.
Abantu abedlula inkulungwane ezilitshumi lambili bakhangelelwe ukungena umhlangano weCongress lo oqala ngoLwesine.