Sokuleviki kuvulwe izikolo abazali abanengi bekhonona ngababalisi abakhalala umsebenzi besithi bafuna iholo elikhuphukileyo elihambelana lesisindo sedola leMelika.
Lokhu bengafundi abantwana kusukela ngeviki ephelileyo kulandela ukukhalala umsebenzi kwababalisi njalo abanye abazali belokhu behlutshwa yikuswelakala kwemali yokuhlawulela izifundo.
Ababalisi abanengi abafundisa ezikolo ezisemaphandleni bathi kababuyeli emsebenzini ngoba kabalamali yokugada amabhasi lokuthenga ukudla.
UMnu. Fortune Jamela, unobhala wenhlanganiso yababalisi abafundisa emaphandleni eyeAmalgamated Rural Teachers’ Union of Zimbabwe, uthi uhulumende kumele abanike imali elesisindo esihambelana ledola leMelika ukuze babuyele emsebenzini.
“Singathi siyakhangela ezikolo ezinengi akulabantu abahambileyo ngoba kabatholanga isixwayiso esiyiso abasilindele ukuthi sethulwe nguhulumende esokuba imali yabo izahlawulwa ngokuhambelana lesisindo sedola leMelika. Lokhu okukahulumende ukuthi afake athi yi-cushion allowance sikwalile sathi thina asifuni ukuthi uhulumende abe elokhu esiqila njalo nje isikhathi sonke. Sifuna enze okufunakalayo.”
Lokhu kusekelwa ngumgcinisihlalo wenhlanganiso le, uNkosikazi Sukoluhle Ndlovu, othi kaboni ababalisi bebuyela emsebenzini ngoba iholo labo liphansi kakhulu.
“Lapha sikhangela ngodaba lokungavuli kwezikolo ngenxa yokungunguna kwababalisi abathi imali yabo incane njalo lokuthi seyaphela abayihola mhlaka 17 ngoDecember. Ngakho-ke ababalisi abanengi abasebenza emaphendleni behlulekile ukubuyela ezikolo ngoba inhlawulo yokugada amabhasi ikhuphukile ezindaweni abasebenzela khona. Behlulekile ukuthi bahlanganise leyo mali ukwenzela ukuthi babuyele emsebenzini. Inengi labo bahlezi emizini yabo bamelele ukuthi uhulumende akhuphule iholo labo.”
Uhulumende usanda kwethulela izisebenzi iholo eliphindiweyo njalolemali efika amakhulu ayisikhombisa lamatshumi amahlanu amadola eZimbabwe eyokubanceda ukuthi bahlawulele indleko zabo ezitshiyeneyo. Isisebenzi sikahulumene esihola imali ephansi besesikhuphulelwe iholo layafika inkulungwane ezedlula kancane ezintathu zamadola eZimbabwe – 3,033 ngenyanga.
Izisebenzi zikwalile lokhu zisithi imali le kayenelisi indleko zabo. Lokhu sokutshiye abazali bethithibele ngokwenzakala ezikolo. Omunye wabakhathazekileyo nguNkosikazi Nozipho Ndimande, isakhamuzi sakoBulawayo.
“Okusezikolo kunzima kakhulu. Khathesi abantwana batshonela ukudla kuphela ngoba abafundi lutho. Nxa kusasa sesikhala ngokuphumelela kwabantwana kumele sibekwazi ukuthi kusukela ngaphi. Ngakho-ke kufanele uhulumende angenele masinyane kulokhu. Imali yokuthi sihambise abantwana ezikolo ezizimele zodwa kasilayo. Singayithatha ngaphi i$20,000 eyokuhlawulela iterm linye ngalinye lapha eZimbabwe?”
UNkosikazi Pellinoh Moyo laye uthi uphathekile ngabantwana abangafundiyo nsukuzonke.
“Ngiphatheke kabi ngento eyenzakala ezikolo. Zivuliwe izikolo kodwa akulanto eveza lokhu. Abantwana batshona phandle kwezindlu zokufundela ngoba kubikwa ukuthi ababalisi abafundisi. Kasisela mathe ngokwenzakala ezikolo.”
Omunye njalo umzali okhala ngokwenzakala ezikolo nguNkosikazi Sikhunjuliwe Ndebele.
“Udubo lwamatitsha lukhona kakhulu lapha koBulawayo. Abanengi kabakabuyi ezikolo. Abanye babuyile kodwa abantwana kabafundi. Kunzima bantu!. Lenhlawulo yezikolo ikhuphukile lobanje uhulumende ubethe akumelanga kwenziwe lokhu. Inhlawulo yezifundo lonyaka kayifani leyanyakenye. Ngilomntwana ofunda emaphandleni. Kuthiwa ababalisi kabayanga ezikolo ngoba kabalamali yokugada amabhasi.”
Kasenelisanga ukukhuluma ngodaba lolu labaphathintambo bakahulumende ababona ngezemfundo. Akwaziwa ukuthi okwenzakala ezikolo kuzaphetha ngani.
