Ukaputeni weqembu elimela ilizwe leZimbabwe emdlalweni kakhilikithi uSean Williams uthi iqembu leli litshengise ingqubelaphimbili enkulu loba nje linqotshwe ngele Pakistan emidlalweni eyomncintiswano we Twenty20.
Ekhuluma ekupheleni komncintiswano we T20 ukaputeni uWilliams uthe ikusasa yeqembu leli ithembisa ukuba izakuba ngenhle kakhulu.
“Ngokubona kwami sidlale kuhle kakhulu kulimidlalo. Besixoxa ngakho ukuba silabadlali abasakhulayo abeza lazo abajika ibhola.
Ekutshayeni ibhola sesilaye uWesley Madhevere njalo nxa singabe silokhu sibatholela imidlalo ngokuhamba kwesikhathi sikhangelele ukuba sizancintisa kuzwakale lathi emidlalweni yezizwe zomhlaba,” kutsho uWilliams.
Iqembu le Zimbabwe lele Pakistan adibane emidlalweni emithathu eyohlobo lwe T20 njalo emdlalweni wakuqala elase Zimbabwe linqotshwe ngama runs alitshumi lanye.
Emdlalweni wesibili iqembu le Zimbabwe linqobe ngama runs alitshumi lathoba munwe munye njalo bekungokwakuqala ukuba iqembu le Zimbabwe linqobe ele Pakistan kumidlalo eyohlobo lwe T20 kumidlalo elitshumi lesithupha.
Impumela eyomdlalo wesibili iphe ithemba abalandeli beqembu le Zimbabwe elokuthi mhlawumbe linganqoba ele Pakistan lasemdlalweni wesithathu kodwa akusabanga njalo ngoba ele Pakistan linqobe ngama runs angamatshumi amabili lane.
Amaqembu lawa womabili azahlaba ikhefu abesedibana kumidlalo emibili eyohlobo lwe test. Umdlalo wakuqala owe test uhlelwe ukuba uqale ngoLwesine mhla zingamatshumi amabili lathoba munwe munye kuyonale inyanga kaMabasa usiyafika mhla zintathu kunyanga kaNkwenkwezi.
Umdlalo wesibili wona uhlelwe ukubakhona mhla ziyisikhombisa kunyanga kaNkwenkwezi usiyafika emaphethelweni mhla zilitshumi lanye kuyo njalo inyanga kaNkwenkwezi.
Yomibili limidlalo izadlalelwa esigodlweni iHarare
