“Akula langa elaphuma elinye lingakatshoni.”
La ngamazwi ethulwe ngusikomitshi weZanu PF uMnu Savior Kasukuwere esethusela amalunga alelibandla wona athi afuna isikhundla sikaMongameli Mugabe lanxa esaphila.
Ekhuluma eseChiweshe ngeSonto, uMnu Kasukuwere utshele amalunga ebandla lakhe ukuthi kumele etshiyane lokulwela izikhundla njalo aye emhlanganweni omkhulu walelibandla ngoMpalakazi ebambene.
Uthe labo abangaba bekhangele isikhundla sikaMugabe bazathathelwa amanyathelo aqinileyo.
Ukulwisana okukhona kulelibandla kathesi kuphakathi kwexuku elizibiza ngokuthi yiG40 lelinye elibikwa likhokhelwa kumbe lisekela uMnu Emmerson Mnangagwa.
Ingcwethi kwezombusazwe uMnu Dumisani Nkomo uthi amazwi kaMnu Kasukuwere engaba eqondiswe kuMnangagwa.
Kodwa uthi uboba kungaba nzima ukuthi lelibandla lixotshe uMnu Mnangagwa ngoba lisesaba ukuthi ulakho ukubambana leMDC loNkosikazi Joice Mujuru babumbe ibandla eliqinileyo elilakho ukususa iZanu PF embusweni.
Amazwi la ngibona eqondiswe kuMnangagwa leqembu alikhokhelayo,” kutsho uNkomo.
