Izakhamizi zakoBulawayo zithi ukwehluleka kwekhansili ukuqhatsha abongi kanye labomanjinela abadingakalayo lanxa ithole imvumo yokwenza lokhu kugatsha lokubuswa kwezabelo kutshengisa ukuthi ayingeke imelele imali ebhadalwa yizakhamizi ukuthi ibhadale zonke indleko zayo kodwa sokumele kuqalwe amabhizimisi azaphathisa ikhansili ukwenza umsebenzi wayo.
Ikhansili yakoBulawayo ithi ilezisebenzi ezizinkulungwane ezintathu kuphela yona idinga inkulungwane ezinhlanu kodwa iyehluleka ukuqhatsha ngenxa yokuswela imali.
Kunyanga ezidluleyo, ikhansili ibisithi iyehluleka ukuqhatsha ngenxa yokuthi lokhu kwamiswa lugatsha lokubuswa kwezabelo kodwa lanxa nje ikhansili isiyitholile limvumo yokuthi iqhatshe abongi abangamatshumi amathathu kanye labomanjinela abathathu, iyehluleka ngenxa yokusilela kwemali yokubhadala.
Umeya wedolobho leli, uKhansila Martin Moyo utshele osomabhizimisi bedolobho emhlanganweni ukuthi njengomqhatshi, ikhansili iyehluleka ukwenza umsebenzi wayo njalo inhlangothi zempilakahle labomanjinela kazisaqhubi ngendlela ngenxa yokusilela kwezisebenzi. Uthi udubo lolu lwengezwa yikuthi izakhamizi azisabhadali ngendlela, zikweleda ikhansili imali phose izigidi ezilikhulu – i$84 million.
Uqhubeke ethi ikhansili iyazama ukulandela izimiso zokuthi emalini ebhadalwa yizakhamizi isilinganiso sokungamatshumi amathathu ekhulwini-30% ibhadale izisebenzi kuthi eseleyo isebenzele uzulu kodwa kunzima nxa kuvele kungena imali encane esikhwameni sekhansili.
Ekhuluma ngalo loludaba, ukhansila kaWard 7 njalo engumgcinisihlalo wekhomithi yokusetshenziswa kwemali, uMnumzana James Sithole, uthi izakhamizi ezinengi kazibhadali imithelo okuyikho okubangela ubunzima ekubhadaleni izisebenzi ngesikhathi kanye lekuqhatsheni ezintsha. Uthi phezu kwalokhu, ugatsha lwezabelo yilo oluvame ukuquma imali eyabe idingwa yikhansili lanxa iyabe ivumelane lezakhamizi.
UMnumzana Elijah Matshe, oyisakhamuzi, uthi inkinga zonke lezi ikhansili ebhekane lazo zibangelwa yikwehluleka ukuhlela kuhle inhlelo kanye lokusetshenziswa kwemali okungaqondanga ekhansilini. Uthi ikhansili idinga ukukhulumisana lenhlanganiso ezimela izakhamizi ukuze kutholwe ingqubelaphambili ngoba ukumisa ukuqhatshwa kwezisebenzi kulakho ukutshiya uzulu elohlupho ekwelatshweni, ekulungisweni kokuhanjiswa kwamanzi, ukubuthwa kwezibi lokunye okunjalonjalo.
UNkosikazi Busisiwe Jamela, oyisakhamuzi, uthi kuqakathekile ukuthi ikhansili isebenze gadalala kwezebhizimisi ngoba lelidolobho ligcwele abantu abalahlekelwa yimisebenzi okwenza kubenzima ukuthi babhadale inhlawulo yekhansili.
Lanxa nje imihlangano yokuhlela ukusetshenziswa kwemali eye budget isenziwa minyaka yonke, izakhamizi zethesa ikhansili icala lokuzibhada ngodaka emehlweni ngoba imbono yazo ingalandelwa. Ikhansili ilempahla efana lamapulazi e Umguza kanye le Hyde Park, okusanda kuxotshwa abantu, kanye lenkampani ye Ingwebu izakhamizi ezikhangelele ukuthi kuphathise ekuletheni imali yokubhadala izisebenzi.