IBotswana ithi ibhekane lohlupho lwabeZimbabwe abangena lezilimo bezothengisa kodwa bengela maphepha abanikeza imvumo yokungenisa lezimphahla. AbeZimbabwe bona bathi lokhu kubangelwa yikuncipha komkambo wokuthengisa ekhaya.
Oncedisa usiba lokhulu obona ngezokulima eBotswana, umnunzana Fidelis Molao uthi ilizwe lakhe kumele livule amehlo ukwenqabela ukumemetheka kwemikhuhlane ephathelane lezilimo. Uthi lokhu kuza ngemva kokuba abeZimbabwe basebenzise kakhulu umngcele weRamokgwebana ukungenisa izilimo ngundlu bezozithengisa.
Izihambi kumele zithole incwadi eziqondileyo ukungenisa izilimo ezifana lemibhida kanye lezithelo ukuze zihlolwe ukuthi zifanele ukudliwa zingelamikhuhlane.
UMolao ukhale ngokuthi noma bangaze bezame ukuhluza labo abangena emngceleni weRamokgwebana, kukhona abeqa umngcele bangene ngezinye indlela ezingekho emthethweni.
Ngokunjalo iBotswana izakhulumisana logatsha lozokulima eZimbabwe ukwenqabela ukumemetheka kodubo lolu.
AbeZimbabwe bona bathi bafuqwa ngumumo wezenotho oselizweni lapho inengi eseliphila ngokuthengisa kusitsho ukuthi inani labathengi liya lincipha abathengisayo besiba banengi.
USiphoesihle Sibanda laye uvumelana loMaMoyo esithi inyathela leli litshengisa amathuba okuziphilisa alokhe encipha eZimbabwe.
Ingcwethi ebona ngezomnotho, uMnu. Jethro Mpofu uthi kumgceke ukuthi inengi ngeliphila ngokuthengisa okuyisitshengiselo sokuthi umumo womnotho kawumanga kahle elizweni.
EleBotswana lona lithi liyamukela ukudla okungena elizweni okunganceda ukuthuthukisa iziphala zalo kodwa lokhu kumele kwenziwe ngendlela eqondileyo njalo esemthethweni.
Amazwe ambalwa agoqela iBotswana kanye le Zimbabwe azangena emkhankansweni wokubonisana ngengozi zokungenisa izilimo kanye lokudla ngundlu. Inhlanganiso ebona ngezokudla emhlabeni jikelele eye Food and Agriculture Organisation-FAO, yiyo ephathisa ekuqhutshweni kwalumkhankaso, ngemali engaba ngamadola eMelika inkulungwane ezingamakhulu amathathu-S$300,000.
