Izizalwane zeZimbabwe ezafaka izicelo zokuthola amapermit eZimbabwe Special Permits (ZSP) kweleSouth Africa nyakenye, seziqalile ukuthola amapermit azo.
Kodwa ke, kulabanye abathi sebeyincitshiwe imvumo yokuhlala kwele South Africa njalo sebephiwe amalanga alitshumi okuthi baphume baphele kweleSouth Africa.
Ngemva kwenyanga ezintathu ezigcweleyo, izizalwane zeZimbabwe ezihlala kwele South Africa zifake izicelo zokuthola amapermit eZSP, abanye babo sebeqalile ukuwathola la amapermit.
Umnumnzana Kingston Ncube, ozalwa koSigangatsha eKezi ngomunye wabantu bokuqala ukuthola ipermit yakhe. Uthi uthokoze kakhulu ethola ukuthi uphiwe iminyaka emithathu yokusebenza kweleSouth Africa. Kodwake uthi imigoqo efakwe kula mapermit yiyo emephule inhliziyo. Lamapermit abhalwe ukuthi kakulamvumo yokuthi kuphinde kwengezelelwe iminyaka, ngeke uyiguqulele kolunye uhlobo lwepermit njalo ngeke uyisebenzise ukudinga imvumo yokuhlala kwele South Africa kokuphela.
Kusenjalo kulabanye abebefake izicelo zala mapermit abathi sebeyincitshiwe imvumo baphiwa insuku ezilitshumi kuphela ukuthi baphume baphele kweleSouth Africa. Kwabangaphiwanga imvumo abanye kuthiwa kabalethenga zonke incwadi ebezifuneka kukanti abanye kuthiwa kutholakele ukuthi kulamacala abawenzayo.
Omunye wabancitshwe imvumo ongathandanga ukuthi igama lakhe livezwe, uthi okwenze wathukuthela yikuthi encwadini ayiphiweyo kubhalwe ukuthi akalamvumo yokuphikisa loba ukuthola enye ingcazelo ngesinqumo esikuleyo ncwadi.
Umnumnzana Butholezwe Nyathi, isiphathamandla senhlanganiso ye Migrant Workers Association of South Africa, uthi balungiselela ukubonana logatsha lwendaba zasekhaya ukuze bathole ingcazelo egcweleyo ngalabo asebencitshwe imvumo. UNyathi uthi zonke izicelo ezemukelwayo zazihlolwa kubonakale ukuthi zonke incwadi ezifunekayo zikhona, ngakho uthi nxa kulezinye izincwadi ezitholakale zingasekho, ziyabe zilahleke khonale emahofisini ogatsha lwendaba zasekhaya.
Phakathi kwezizalwane zeZimbabwe eziphose zifike izinkulungwane ezingamakhulu amathathu (295,000) ezazifake izicelo zokuthola amapermit eDZP ngo 2010, bedlula kancane kunkulungwane ezingamakhulu amabili (207,000) abafaka izicelo zokuthola awe ZSP.