Seluphenduke insindabaphenduli udaba lokuxotshwa kweqembu lamajaha aleminyaka engaphansi kwelitshumi lasikhombisa elimela ilizwe kumncintiswano walonyaka owe COSAFA Men’s Under 17 oqhutshelwa kwele South Africa.
Abalandeli bomdlalo wenguqu basele bebambe owangaphansi ngemva kokuba iqembu lamajaha aleminyaka engaphansi kwetshumi lesikhombisa elimela ilizwe lixotshwe kumncintiswano we COSAFA Men’s Under 17 ngoLwesihlanu olwedluleyo.
Isizatho sokuxotshwa kweqembu leli kuthiwe lilabadlali asebekhulile kodwa kuthe ngemva kokuba inhlanganiso ye Zimbabwe Football Association isithe yacela ubufakazi balokho, uDokotela Thulani Ngwenya osebenzela inhlanganiso ye CAF, ukhuphe umbiko esithi ukuhlola amathambo, okuyiyo indlela esetshenziswe ukubona ukuba abadlali bangakanani akuvezi obala ukuba umdlali uleminyaka emingaki.
"I MRI yinto yakudala njalo kudala yayibizwa kuthiwa yi MRI for age determination kodwa lokhu sekwaguquka ngoba singabantu silemvelaphi eyehlukeneyo, sidla ukudla okutshiyeneyo, okutsho ukuba asikhuli ngokufanayo. Ekwenzayo iMRI yikuthi ikhangela ukuba ithambo selihlangene yini njalo nxa ithambo lomdlali selihlangene lowomdlali akavunyelwa ukudlala kulumncintiswano kodwa lokho akutsho ukuba lowomdlali useleminyaka eyedlula elitshumi lesikhombisa.”
Udaba lokuhlolwa kwamathambo beluvele seludale enkulu impikiswano kwele Zimbabwe phambilini kokuxotshwa kweqembu le Zimbabwe kumncintiswano we COSAFA ngemva kokuba umdlali odabuka eHwange uKlaivert Tshuma kuthiwe utholakale ukuba umdala ngemva kokuba abadlali behlolwe amathambo.
Umama ka Klaivert usihlabe wasilawula isililo esithi umntanakhe bayamhlolela.
Intathelizindaba yezemidlalo uFortune Mbele uthi kuzamele kusentshenziswe ezinye indlela ezicacileyo ukuhlola ukuba abadlali bangakanani.
Udaba le MRI luyaphica. Nxa kuyikuthi impumela ye MRI ayenelisi ukutsho ukuba umdlali uleminyaka emingaki yindaba manje isentshenziswa ukuvalela abadlali lamaqembu ukuphatheka kumncintiswano efana lowe COSAFA.
Kungcono kusentshenziswe ezinye indlela ezifana lencwadi zokuzalwa lezesikolo ngoba zona ziyabe zingezeqiniso.”
Iqembu le Zimbabwe liphenduke namhla ekhaya ngemva kokuba inhlanganiso ye Zimbabwe Football Association ingatholanga mpendulo evela kunhlanganiso ye Confederation of African Football ngemva kokuba iZifa ibhale incwadi isithi ele Zimbabwe limsulwa kuloludaba lokudlalisa abadlali abadala kumncintiswano we Under 17.
