Abezempilakahle koBulawayo bakhuthaza uzulu ukuba ahlale ehlanzekile lokuthi engahlaselwa yisihudo agijimele ezibhedlela. Bathi kuqakathekile njalo ukunatha amanzi ahlanzekileyo lokudla ukudla okuphekiweyo.
Kunyanga edluleyo edolobheni leli kubelabantu abaphansi kwetshumi abahlaselwe yisihudo njalo ugatsha lwezempilakahle, uhulumende weJapan, iUnicef leWorld Health Organisation baqhuba inhlelo zokulimukisa uzulu ngomkhuhlane lo eZimbabwe.
UDokotela Maphios Siamuchembu, ophethe isigaba sakoBulawayo, uthi kunengi okudala umkhuhlane lo.
"Ngenxa yikusilela kwamanzi uzulu ucina esiyakukha amanzi angcolileyo emachibini lapho okugelezele khona amanzi engcekeza ngoba siphakathi kwesikhathi sezulu."
UDokotela Siamuchembu uthi kumele abantu besebenzise amanzi ahlanzekileyo.
"Ungananzelela okwamanje inengi elinatha amanzi angahlanzekanga bacina behlaselwa yisihudo esifana laboCholera oTyphoid leminye imikhuhlane yesihudo lobuhlungu besisu yiyo imikhuhlane evane koBulawayo ngesikhathi sezulu."
UDokotela Edwin Mzingwane, okhokhela uhlangothi lwezempilakahle koBulawayo, ugcizelela esithi umkhuhlane lo welatshwa ngedlela ezitshiyeneyo.
"Ukuhuda kubangelwa yizinto ezinengi ezibalisa ukudla okungcolileyo lokunatha amanzi angahlanzekanga. Sikhuthaza abantu ukuba bagijimele emtholwampilo uma bengahlaselwa yisihudo njalo siselapha ngokubapha amanzi ahloliweyo kuthi uma umuntu eselahlekelwe kakhulu ngamanzi emzimbeni sihle siwahlabele emzimbeni simuphe idrip."
Sixoxe njalo ngodaba lolu labahlaselwe ngumkhuhlane lo. UNkosikazi Nonhlanhla Mlilo ohlala eBurombo Flats uthi ingane yakhe ibiphethwe yisihudo.
“Kuviki edlule sikesathwalqnzima umntwana esetshaya phansi laphezulu kwanceda ukuthi simenzele isalt and water solution saphinda samosa ekilinika besekukubi.”
Ugatsha lwezempilakahle lusebenzelana leW.H.O leUnicef babika ukuba kumnyaka odluleyo eZimbabwe kulabantu abazinkulungwane ezingamatshumi amathathu lasithupha - 36,000 abahlaselwa yisihudo kwabhubha abangamakhulu ayisithupha - 600.
Forum