Ixuku labasekeli bebandla le Zanu PF lenze ubudlwangudlwangu kwaze kwamiswa ukuphawulwa kohlelo lokwakha indawo yamabhizimusi oluqutshwa ngosomabhizimusi bakwele China.
Abasekeli be Zanu PF laba bathembise ukutshaya amakhansila lezisebenzi zikamanisipala weHarare ebezikhokhelwa ngusibalukhulu walelidolobho, uMnu. Tendai Mahachi nxa lumkhosi ungaqhubeka kungela mphathintambo wezabelo, uMnu. Ignatius Chombo obekhangelelwe ukuba ngumhlonitshwa kodwa engesenelisanga ukuba khona.
Abasekeli be Zanu PF laba bebekhokhelwa ngukhansila obe bizwa ngegama lokuthi nguMnu. Martin Matinyanya.
IStudio Seven ibuze umsekeli kameya, uMnu. Thomas Muzuva ukuthi uMatinyanya uzajeziswa na ngodaba lobudlwangudlwangu lobu, kodwa uMuzuva uthe lokhu kuzabonwa libandla leZanu PF.
Indawo yamavinkili efuna ukwakhiwa yinkampani yeConsortia International ibikwa izaba lemikhambo yama flea market, amabhanga, izitolo lezinye izakhiwo emzini weMbare.
UChris Gande weStudio Seven uxoxe lokhansila wemzini we Southerton eHarare, uMnu. Peter Moyo othi abasekeli beZanu PF laba bebesethesa ikhansili icala lokukhankasela usekelo.