Umanyano weAfrican Union usungule umhlangano omkhulu kweleZambia ngoLwesine lapho abammeli bamazwe eAfrica abanikana khona amaqhinga okuqeda uzubo lokwendiswa kwabantwana.
Umphathintambo wezabesifazana eZimbabwe uNkosikazi Nyasha Chikwinya ngomunye wabaphatheke kulumhlangano kanye labammeli babohulumende bamazwe atshiyeneyo.
Omunye oyendiswayo esamncane ohlala eBindura uNkosikazi Faith Matare uthi ohulumende kumele bathathe amanyathelo okuqeda loludubo.
“Uhulumende kumele athathe amanyathelo aqinileyo luqedwe udaba lokwendiswa kwabantwana,” uMatare utshele lumsakazo.
Amazwi akhe agcizelelwe ngabanye abakhulume emhlanganweni lo, wona oza ngesikhathi kunanzwa umkhankaso wokulwisana lokuhlukuluzwa kwabesifazana owe16 Days of Activism Against Gander-Based Violence.
Kunjalo nje, abasakhulayo bathi bathukuthele ngokuswelakala kwenguquko kudaba lokuhlukuluzwa kwabesifazane lolu lanxa kumelikhankaso yokuqeda uhlupho lolu.
UNkosazana Nomaliso Ncube, ofunda eUniversity of Zimbabwe uthi okwamanje imikhankaso le ikhanya iyikukhuluma nje kuphela kungelamanyathelo athathwayo.
Amazwi akhe agcizelelwe nguGeorge Makombe yena othi kumele umkhankaso lo ufinyelele lendaweni ezikude ukuze wonke umuntu abe lolwazi.
Abokholo lwesiKhristu labo baphatheke emizameni yokulwisana lokuhlukuluzwa kwabesifazana ngaphansi kwenhlanganiso yeZimbabwe Council of Churches.
