Abesifazana abahlala eGwanda bathi bafuna ukuba lomhlabathi edolobheni leli lokwakhe izindlu. Bethule lokhu emhlanganweni oqoqwe ngabenhlanganiso yeWomen’s Coalition of Zimbabwe ongenwe nguMeya weGwanda.
Inengi labomama elingene lumhlangano ngoMvulo likhale ngokusilela kwamanzi, ukudubuka kwempompi ezihambisa ingcekeza kanye lokusilela kwezindlu kulelidolobho.
Omama laba bathi yibo abathwala nzima lapho umanisipala esehluleka ukuqhuba umsebenzi wakhe ngemfanelo.
UNkosazana Duduzile Masilela omunye wabangene lumhlangano uthi njengabomama bathwala nzima ukuthola izitanda zokwakhela izindlu.
“Nxa lingathola iLand, kuphume amastands, kube lamastands okuthiwa ngawabomama. Omama sithola ngendlela ezitshiyeneyo, engawabomama enjalo libe lendlela elifisa nga babhadala ngayo kuthwe lawa ngawabomama specifically omama labo baphiwe first preference nge affordable price laloba iprice iyabe ifanana kube lamaterms of payment ukuze bathole idecent accommodation.”
Omunye oyethule izikhalazo sakhe kuMeya weGwanda nguNkosazana Zanele Nyathi ohlala endlini kamanispala, okhala ngendlela abaphathwa ngayo.
“Kasizake sibabone bebhoda besithi kumbe indlu iyavuza, injani lihleli kahle babhoda kwaphela bacheck kwaphela kowa imali yami yerent bayabe bebuya ukuzoyi thatha nxa ngingayiyibhadalanga bayavala indlu.”
UNkosazana Nomsa Vela, olilunga leWomens Coalition of Zimbabwe, ukhuthaze omama ukuthi bamele amalungelo abo bengela kwesaba.
“Libe ngomama ababrave lisebenze ngendlela , libekwazi amalungelo enu , siyi organisation elwela amalungelo abomama yikho sense lumhlangano ukuthi sibone ukuthi okusigwenxayo kuyalunga yini?.”
UMeya weGwanda, uMnu Jastone Mazhale, uveze ukuba umanisipala wakhe uzimisele ukuthuthukisa impilo yabomama.
Ngodaba olusegudwini olokusilela kwamanzi, uMazhale ubike ukuthi itanka lamanzi eleSpitzkop eselileminyaka elitshumi lisakhiwa lizaqala ukusebenza lapho udubo lokusilela kwagetsi lungedlula.
UMeya ukhuthaze izakhamizi ukuthi zibhadale imithelo kamanisipala ukuze enelise ukuqhuba inhlelo zakhe ngemfanelo.
