Abenhlanganiso yabelaphi bakweleMelika abeOperation of Hope kuliviki basesibhedlela seMpilo Central Hospital lapho abeze ukuzohlinza abantu inengi lingabantwana abazalwa belesimo sendebe ezidabukileyo ese palate and lip cleft.
UDokotela Mora uthi iqula lakhe libunjwa ngodokotela labongi abavela eMelika lakwamanye amazwe emsebenzini abawuqala eZimbabwe ngomnyaka ka2006 eHarare bazowuqelisa ukuze banhlize lakoBulawayo ngoba bananzelela ukuba abantu bahamba umango omude besiya eHarare. Lonyaka baqalele ukuhlinza koBulawayo kuthike ngeviki ezayo baye eHarare.
UDokotela Mora uthi bazahlinza abantu abedlula amatshumi amahlanu njalo sebelungise emitshina emibili esibhedlela seMpilo.
"Sesithe sahlola abantu abadlula amatshumi amahlanu njalo sikhangelele ukuhlinza amatshumi ayisikhombisa nilequla labodokotela. Kusenjalo sesenelise ukulunisa imitshina yokulalisa abantu ngemva kokuhlanganisa imali efika inkulungwane ezilitshumi lambili ukuze umsebenzi wethu ubelula."
UMnu Ozias Ndlovu isikhulumeli sesibhedlela seMpilo uthi NgoMgqibeleo bahlole abantu abedlula amatshumi amahlanu kodwa uthi bakhangelele ukuthi kuhlinzwe abangamatshumi ayisithupha.
“Silabodokotela abahamba lenhlanganiso yeOperation of Hope esuka kweleAmelika sebethe bahlola abantu njalo sebeqalile ukuhlinza abantu abalendebe lezilakalaka ezidabukileyo. Sikhuthaza labo abalohlupho lolu abanezwana nohlelo ukuba baze esibhedlela bazothola usizo kungelambadalo."
UNkosikazi Nobuhle Mathendele osuka ePlumtree uthi uAbongiwe Ngwenya ubelendebe edabukileyo uhlinzwe izolo.
“Indodana yami isithe yahlinzwa indebe ebidabukile sekungincedile ngoba ebephilanzima.Siyalubona uhlelo lolu noba akulamali esithe sayihlawula konke sikwenzelwe kungelambadalo"
UNkosikazi Buhlebenkosi Mhlanga osuka eSt Pauls eLupane uthi indodana yakhe uSimphiweyinkosi Ncube wazalwa elesilakalaka lendebe edabukileyo laye uhlinziwe indebe.
“Indodana yami yazalwa ilendebe lesilakalaka esidabukileyo kodwa lamhlanje uhlinzwe indebe kungela nhlawulo. Kuhlelo oluzayo sithenjiswe ukuba uzahlinzwa isilakalaka njalo lokhu sikwenzelwe sinahlawulanga lutho."
Esinye isakhamuzi sakoBulawayo uNkosikazi Mutaneta Ncube olendodana yakhe uNkosimayibonwe Ncube owayetshe isandla uhlinziwe lamhlanje.
“Indodana yami yatsha ekukhuleni kwayo kodwa isandla sakhe sokudla besingahlangananga kahle, ngiyajabula lamhlanje usethe wahlinzwa isandla basivula uselungile.”
Isakhamuzi sakoBulawayo uLimukani Sithole uthi indodakazi yakhe yaqala yahlinzwa indebe kusasa ukhangelele ukuba ahlinzwe isilakalaka.
“Kumnyaka odlule indodakazi yami yahlinzwa indebe lamuhla sihloliwe sesilinde ukuba ahlinzwe isilakalaka. Ngiyajabula ngoba usefana labanye abantwana isimo sakhe besingikhathaza ngiyalubonga uhlelo lolu.
UHulumende weZimbabwe encedisana lemkampani yamanamunede eyeSchweppes kunye leRotary Club bancedisile kuloluhlelo lokuhlinza indebe lesilakalaka.
Inhlanganiso yeOOH isike yaqhuba lumsebenzi emazweni abalisa iZambia, iMalawi lamanye aseAsia. Linhlanganiso ibunjwe ngodokotela abahlinza indebe lezilakalaka kuphela abazinikelayo ukwenza lumsebenzi kungela mbadalo, bayazihlawulela indleko zokuhamba lokwenza umsebenzi besuka emazweni abo okungabiza imali edlula isigidi samadola eMelika kuhlangene lemithi.
UDokotela Mora uthi phakathi kwabantwana abangamakhulu ayisificaminwe mibili lamatshumi amahlanu abazalwa eZimbabwe ngelanga, oyedwa uzalwa elendebe kumbe isilakalaka esidabukileyo. Ethi abantwana abazalwa lalesi simo bakhula nzima ikakhulu ekudleni, ukudla kucina kuphuma ngamakhala kubangela eminye imikhuhlane yokuhitshwa yikudla.
Abasemaphandleni abalesimo esinje bengazwanga ngohlelo lokuhlinzwa kungelambadalo bakhuthazwa ukuba bafike esibhedlela eseMpilo loba esiseduzane labo bazohlolwa.
