Bekungabizwa ozwayo emkhosini oqoqwe ngabeNational AIDS Council,
wokufundisana ngemiculo lokunye okokulibazisa uzulu ngokuziphatha kahle kanye lokuzivikela ekuthelelweni igcikwane lengculaza, ele HIV/Aids.
Umbuthano lo wenzelwe enkundleni yeMarisha Grounds elokitshini leOld Magwewe, koBulawayo, kukhuthazwa ikakhulu abasakhulayo ukuba bayekele umkhuba omubi wokuya emicimbini abayibiza ngokuthi ngamaVuzu Parties.
UMqondisi weNAC koBulawayo, uNkosikazi Senatra Nyathi ukhuthaze abasakhulayo ukuba bahlukane lokuya kumaVuzu Party njalo balondoloze impilakahle yabo ukuze babelekusasa elihle.
Okugcizelelwe nguNkosikazi Nonjabulo Mahlangu obona ngokuqhutshwa kwenhlelo enhlanganisweni eyeCommunity Working Group on Health.
Umsekeli kamqondisi wohlangothi lwezempilakahle kukhansili yedolobho lakoBulawayo, uMnu. Khulamuzi Nyathi uchasisa kabanzi ngendlela abaphatha ngayo umkhankaso wokwenqabela ukuthelelanwa kwegcikwane lengculaza lalabo asebevele bephila legcikwane.
Inhlanganiso yeNAC iphakathi kokufeza uhlelo olwasungulwa ngomnyaka ka2015 kusiya ku2020 lwezinqumo zokulwisana lokumemetheka kokuthelelanwa kwegcikwane lengculaza ezweni.
Ilizwe leZimbabwe likhangelele ukuba kusiyafika umnyaka ka2030 inani labantu ababamba abathelelwa igcikwane lengculaza libe selehlile.
Ilanga lalonyaka ele World Aids Day belinanzwa ngaphansi kwendikimba ethi ''The Communities Make the Difference.''
