Abenhlanganiso enceda abafundi ngokubabhadalela indleko yezifundo lokuthenga impahla lokudla, eye Mopane Foundation International bebambisana labenhlanganiso yeInspire Women, Men and Children basungule uhlelo lokufundisa abazali, ababalisi labafundi ukuthunga imvunulo yokuvitsha uma omama lamantombazana besesikhathini amasanitary pads, alakho ukusetshenziswa njalo nje kulandela ukuqansa kwentengo yalawo asetshenziswa kanye alahlwe. Lokhu kwenziwa emizameni yokuthuthukisa impilo lemfundo yomntwana oyinkazana.
lnengi lamankazana afundayo ngesikhathi besemfuleni, bayehluleka ukuya esikolo ngoba bengela mpahla yokuvitsha okubangela ukuba basalele emuva kwezemfundo ngoba nyanga zonke phose iviki bayabe bengayi esikolo.
Oqhuba uhlelo lokuthunga imvunulo yokuvitsha uNkosazana Ncube uthi uhlelo lolu balusungule eShurugwi njalo bazaluqhuba kuzozonke izikolo ezilabafundi ababancedisayo.
“Uhlelo lokufundisa abazali, ababalisi labafundi lokuthunga iziviko silusungule eShurugwi ezikolo lapho esilabafundi esibaphathisayo njalo sizaluqhuba kuzozonke izikolo esilabafundi khona lobanje ukuma manzonzo kwezomnotho kukhanya kuzasibisela emuva noba akulula ukuthola imali yokuthenga amalembu lokudingakalayo ukuba sifinyelele kuye wonke umuntu esikhangelele ukufika kuye.'’
Ababalisi labazali beDlodlo Primary School eShurugwi South abedlula amatshumi amahlanu bebathe gwaqa ngoLwesithathu befundiswa ukuthunga imvunulo yabomama engageziswa isetshenziswe njalo nje okweminyaka phose emihlanu.
UNkosikazi Laitta Chatenga uthi uhlelo lolu luzabanceda ikakhulu amankazana asesikolo ngoba inengi labo selikhulile.
“Uhlelo lolu luzasinceda kakhulu thina sakhula sidabula ingubo sisebenzisa. Amankazana asafundayo khonapha eDlodlo bazancedakala ngoba sebeludina usizo lolu sizabafundisa ukuze impilo ibelula kibo.”
UMbalisi weDlodlo Primary School uNkosikazi Sekai Shura uthi sebezathungela abafundi babo limvunulo esikolo ngoba bavame ukuwona izigqoko laleyo ethengwa emavinkilini isidula kakhulu.
“Uhlelo lolu luhle kakhulu njalo sifundile lamhlanje sesizathi ukuthungela amankazana ethu lapha esikolo noba ineni labo livame ukuncolisa impahla yabo esikolo kubangelwa yikuthi amapads athenwayo emavinkilini asedula kakhulu.”
Esinye isakhamuzi esiphatheke ezifundweni zokuthunga izivitsho uNkosikazi Rita Ndlovu umgcinisihlalo weDlodlo Primary School Development Association uthi loluhlelo luzanceda kakhulu ngoba inengi lamantombazana bezintandane abangela ababanakekelayo.
“Uncedo lolu luhle kakhulu ebantwaneni, thina njengabazali sesizancedana labantwabethu, luncedo oluhle kakhulu ikakhulu uma ungela mali, njalo abantwana elibancedayo luzabanceda kakhulu ngoba bayabe behawulile abantwana uma kunje sekuzabanceda kakhulu.'’
UNkosikazi Jesta Ndlovu uthi uhlelo lolu luzanceda hatshi intandane zesigabeni kuphela kodwa labaswelayo.
“Uhlelo lolu elize lalo luhle kakhulu ngoba linceda intandane ezinengi buye njalo iziviko lezi sezizakwenza ukuba impilo ebelula nanko akudingi mali nyanga zonke.”
UNkosikazi Veronica Gwizi ubonge abeMopani Foundation ethi baluthandile uhlelo ngoba impilo inzima kulezi insuku bacela ezinye njalo inhlelo ezizaphakamisa abafundi kulesi sigaba.
“Siyalubonga kakhulu uhlelo lweMopani Foundation, siluthandile loluhlelo ngoba izikhathi sezinzima imali ziyahlupha zokuthenga amapads nyangazonke sicela babuye njalo lezinye inhlelo zokuthuthukisa impilo zabantwabethu, siluthandile loluhlelo.”
Inhlanganiso yeMopani Foundation International ilenhlelo zokuphathisa abafundi ezikolo zemfundo yaphansi laphezulu eTsholotsho, Shurugwi, Nkayi, Kezi leMatopo. Isiyenelise ukubhadalela abafundi imali yesikolo, ukubathengela amabhuku, amayunifomu lokudla. Kulolu hlelo olutsha bathi baqoqa ukufundisa ababalisi labazali balezi zikolo ukuthunga imvunulo yabesifazana uma besesikhathini. Intengo yemvunulo esetshenziswa kanye ilahlwe isuke yaqonga okwesabekayo kusukela ngomnyaka odluleyo, iphakethe elilodwa elilohlonzi selibiza phose itshumi lamadola osekutshiye inengi labasakhulayo bebhekane lobunzima, kuthi abafundayo begcina bebanjwa ngamandla ukungayi esikolo ngensuku besesikhathini.
