Abantu abanengi ezigabeni zeMatabeleland bathi sebelahlekelwe lithemba lokuthi bazafa bathola inkokheli elohlonzi kwezombusazwe edabuka kulesisigaba selizwe ngoba ekhona okwamanje ingabaniki idlabuzane.
UMnu Obert Ndlovu isakhamuzi seNketa uthi inkokheli zikhona kodwa ziyethuswa ngumkhokheli okhona khathesi elizweni.
''Inkokheli zeMaNdebeleni zikhona zinengi kakhulu kodwa ubugwala obukhona ngenxa yenkokheli yethu ephuzulu uED enini anini eyabaqedayo khathesi ulwisane lomfana kaNdiweni, nangu uDabengwa useze wahamba kwehlule, oMaduna bathe bayakhuluma ngeGukurahundi sebehleli ubhobho. Sekunzima ukuba inkonkeli ziphumele egcekeni zisekelwe zinanathi ziyavusa amehle badalelwa amacala anekhoyo. Ngaphandle kuze kubelokuthula eweni akula nkokheli ezizaphuma njalo uma loMongameli ED owaqhuba umbhuqazwe weGukurahundi ekhona ebusa akulankokheli ezaphumela egcekeni ibonwe ngumhlaba.''
UMnu Morgan Shumba isakhamuzi sakoBulawayo yena uthi abantu abaphiwa amathuba alinganayo.
''Abakaphiwa ithuba abantu beMaNdebeleni ukuba baphathe, aluba kuyavuma kube lamazopha okubusa phakathi kwaMaNdebele lamaTshona kulapho esingavuma ukuba akulankokheli njalo uJoshua Nkomo wasebenza labantu abanengi ababengababusi ngakho ukuthi akulankokheli kulo umhlubulo welizwe ngamanga.''
Uqhubeke ethi umbuso wezabelo uzaveza ukuba ubukhokheli bukhona.
''Abantu bakithi abaphiwe amathuba okuzibusa ezabelweni zabo hatshi ukudingelwa ubukhokheli obuphuma kwezinye izigaba zelizwe, lokho kuyasibulala njengabantu. Silabazali bethu lezikhwicamfundo abaphiwe amathuba qha. Ugcobo lokubusa luvelelusuka eMatabeleland abaphiwe amathuba qha.''
Osakhulayo wakoBulawayo, uMnu Zibusiso Mkhwananzi uthi zikhona inkokheli eMaNdebeleni labo abathi azikho bayaphosisa.
''EMaNdebeleni zikhona inkokheli ezingabusa ilizwe, zigcwele lami ngingeyinye yakhona inkokheli enabusa ilizwe leZimbabwe. Othi ilizwe alila nkokheli uyaphosisa.Abantu bayazikhulumela noba balelungelo lokukhuluma abakuthandayo.''
UMnu Thomas Sithole olwela amalungelo oluntu uthi ubukhokheli buvele abukho ezweni jikelele.
''Mina ngibona anathi uma sisithi eMatabeleland akula bukhokheli siyabe singakhulumi iqiniso, uma sikhangela ilizwe jikelele silohlupho lobukhokheli, ngikutsho nokuba laho esikhona njengelizwe akula buhle konke kubuyela emuva kutshengisa ukuba okuseMatabeleland yikho okwenzakala elizweni.''
UMnu Mandla Tshuma esinye njalo isakhamuzi sakoBulawayo uvumelane loSithole.
''Lapha eMatabeleland ukuthi akulabukhokheli siyabe sisitsho ilizwe lonke jikelele sisitsho lakhonale esigodlweni kusehla kusiyaphansi. Lapha ezweni abantu bakhangela imuli zabo izilwe lonke sikhangela indaba zombusazwe njalo isimo simi kubi ezweni okutsho ukuthi silodubo lobukhokheli.''
Ukubhubha kukaDokotela Dumiso Dabengwa kubikwa kutshiye isikhala esikhulu sobukhokheli ezweni kodwa abanye bathi inkokheli zikhona kodwa aziphiwa amathuba aqotho okuba babonise ubukhokheli babo lokukhalipha.
UNduna uFelix Nhlanhlayamangwe Ndiweni ubikwa eyiyo inkokheli yomdabu ekhona okwamanje emela abantu bethi abanye bahlehlela emuva besesaba umbuso okhona ezweni.
Izolo ekhuluma ekoBulawayo NgeNsonto yomthandazo ezweni, uMongameli Emmerson Dambudzo Mnangagwa ucele uzulu lenkokheli yonke ezweni ukuba bakhulekele ilizwe. Kodwa inengi labantu lisola umbuso wakhe bethi awuvezi ubukhokheli obuqotho ngenxa yembali yakhe yayizolo ikakhulu ukuphatheka kwakhe kumbuqhazwe weGukurahundi angafuni ukukhuluma ngakho.
