Abe MDC-T eSouth Africa Bathandazela uMandela

JOHANNESBURG —  Abasekeli belinye lamacele eMDC, elikhokhelwa nguMnu Morgan Tsvangirai abahlala kwele South Africa, ngempelaviki baye bayafika emzini kowaba nguMongameli wakuqala wakwele South Africa uMnu Nelson Mandela kanye lesibhadlela alaliswe kiso ePretoria besiyamthandazela lokumfisela ukuthi asile. UMandela usengene evikini lesine elaliswe esibhedlela ngenxa yomkhuhlane wenhlungu zamaphaphu.

Nsuku zonke amakhulu abantu bethekelela esibhedlela se Medic-Clinic Heart Hospital ePretoria, besiya kuma emasangweni bekhuleka, ukuhlabela kanye lokufisela uMandela ukuthi asile.

NgenSontoke, amalunga ebandla le MDC-T lawo aye ayafika emzini kaMandela eJohannesburg kanye lesibhedlela ePretoria besiyamthandazela lokumfisela ukuthi asile.

Kuye kwacaca ngesikhathi besemasangweni omuzi kaMandela eJohannesburg, omunye wabasekeli beMDC-T laba uMnu Milton Matshazi ethandaza ukuthi, bayamthanda okaMandela.

Sebesuka emzini kamandela ejohannesburg abe mdc laba balubhekise esibhedlela se medi-clinic heart hospital lapho abafike benza into efanayo.
Kusenjalo izizalwane zeZimbabwe zitshayele uMongameli Barack Obama wakwele Melika ihlombe, kulandela amazwi awethule e University of Cape Town mayelana leZimbabwe.

UObama uthe iZimbabwe izaphumelela kuphela nxa izizalwane zayo zingavunyelwa ukukhetha uhulumende ezimfunayo kungelakwethusela.
Izizalwane zeZimbabwe kwele South Africa zithi zilulindele ngamehlo abomvu ukhetho oluzayo lobanje kungakacaci ukuthi luzakwenziwa nini.