EleZimbabwe lithole amadollar aphose afike ibillion eMelika- US$961million ngaphansi kohlelo olwe Special Drawing Rights (SDRs) evele enhlanganisweni ephathisa amazwe womhlaba ngemali yenhlelo zentuthuko, eye International Monetary Fund.
UMphathintambo wezemali umnumzana Mthuli Ncube uthi enye yale mali izasetshenziswa kunhlangothi ezitshiyeneyo ezigoqela ezempilakahle, ezemfundo, ezokulungiswa kwempahla, ezokulima lezinye.
Embikweni owethulwe ngabebhanga elikhulu lelizwe ele Reserve Bank of Zimbabwe - RBZ wasainwa ngusibalukhulu walo u Dr John Mangudya kanye lomphathintambo wezemali U-Proffesor Mthuli Ncube, uveza ukuba limali ingene ku Account ye RBZ NgoLwesibili mhla ka 23 Ncwabakazi, 2021.
Umphathintambo wezemali utshele iphephandaba le Herald ukuba enye yalemali izoqondiswa kunhlangothi eziphazanyiswe yi COVID-19.
Ingcwethi ecubungula ezomnotho umnumzana Masimba Kuchera uchasisa kabanzi ngemali ye-Special Drawing Rights (SDRs).
“Le imali yama Special Drawing Rights, yimali enikwa amazwe njengoba esebunzimeni obe COVID-19. Amazwe yiwo azokutsho ukuthi bazosebenzisa imali zabo kanjani. ”
Uqhubeke uKuchera esithi ulethemba lokuthi izosetshenziswa ngokuqondileyo e Zimbabwe imali le.
“Kodwa thina sibona ukuthi izithembizo zikamphathintambo kanenginengi asiziboni zisenzakala. Silethemba elokuthi iPhalamende izakuba lendlela eyokuthi ibone ukuthi imali zihamba kanjani kumbe esingathi yi Oversight, ukuze izimali lezi zisincede ukuthi lathi sisile ku problem leyi esihlangane layo, eye COVID. ”
Okusekelwe ngunobhala jikelele wenhlanganiso yezisebenzi eye Zimbabwe Congress of Trade Unions - ZCTU umnumzana Japhet Moyo.
“Inkinga nje ekhona yikuthi kuzaba liqiniso yini ke lokho?. Ngokuthi, ukuthi kutholakale imali angazake sikwale, yikho okukhona. Kodwa ukuthi leyo mali izatholakala yini, sizabona ke kusiba lokuntshintsha ezibhedlela yini?. Sizabona ke amankampani ekwanisa ukuboleka ukuze beqhelise phela ezomnotho, kutholakale imisebenzi, asikwazi konke lokhu. Sizabona kulokuntshintsha kumbe ukuphucuka kwenhlelo ezithize ezikahulumende, sizabona yini kule improvement ku-infrastructure yethu.”
Uqhubeke ethi ulethemba lokuba le akusoke kwaba ngenye yemali ezizomane zinyamalale nje njengalokho okuthe kwenzakala kwezinye.
“Silembali ke embi njengelizwe eyokuthi imali esizinikwayo zikhangelelwe ukuthi zincede abantu, lezomali zitholakala ke, zingasatholakalanga ukuthi zisebenzeni. Sesibone isikhathi esinengi kakhulu imali ezibolekiweyo ezivelela kuma-contributors athize, zingafiki lapho okufanele ziyefika khona. Akusoze kusimangalise ma sisizwa ke abaku Private Sector labo besithi hayi, thina sike sazama ukuyidinga limali ukuyiboleka, sayiswela, ama Ministries athize labo, kungaba kuyi Education kumbe ku Agriculture, besithi hayi, thina lathi sayibala emaphepheni.”
Umqondisi wenhlanganiso ephatheke kumikhankaso yokufundisa uzulu ngesisekelo sombuso eye #This Constitution, uNkosikazi Abigial Mupambi upha umbono wakhe laye.
“Okunengi singakhuluma ngakho kodwa okusalayo ngalesi sikhathi, ma sekuthe kwaba lemali enengi kangaka mhlawumbe engcono sikhangelele ukuthi lawo ma-Sectors azaphiwa leyo mali, kucace phela ukuthi izinto ziyantshintsha, mhlawumbe kulomahluko. Lapha eZimbabwe siyananzelela ukuthi abantu bebekhala ikakhulu in these Public Institutions ngendaba eye-Corruption, indaba yokuntshontshwa kwezimali.”
Utqhubeke ethi ulethemba lokuba kuzolandelwa lokho okutshiwoyo uMupambi.
“Sinanzelela njalo sikhangelela ukuthi uReserve Bank Governor lo Finance Minister u Honourable Mthuli Ncube, sibona ama-signatures laphana besibikela ukuthi sekulemali engaka. Sikhangelele ukuthi bazabuya njalo ebantwini sebechasisa ukuthi imali isebenzeni. Njalo kufuze kucace lasebantwini ukuthi hayi, ngempela abantu bayabona ukuthi kube lomahluko in all these sectors ”
Umphathintambo wezemali kanye labebhanga elikhulu lelizwe ele Reserve Bank of Zimbabwe bona bayathembisa ukuba limali izasetshenziswa ngokuqondileyo ukusekela inhlangothi ezigoqela olwezempilakahle, olwezemfundo kanye lenhlangothi ezidinga usizo ezinjengemisebenzini yokulungiswa kwempahla, wezokulima, owokwemba amatshe aligugu, ezezakhiwo, imigwaqo lokwakhiwa kwezindlu leminye imisebenzi etshiyeneyo.