Abenhlanganiso yabaphila ngokuthengisa eyeBulawayo Vendors and Traders Association bahlangene labenhlangothi ezitshiyeneyo zempilo bekhangele inhlupho abahlangana lazo lokuthi benga ncedisana njani. Abakulumsebenzi bakhuthazwe ukuba batshiyane lomkhuba wokuqilibizela ikakhulu labo abasebenza becapha imingcwele yelizwe besiya thenga loba ukuthengisa phandle.
Abenhlanganiso le, bathi sebesungule uhlelo lokucebisana ngendlela abangathuthukisa ukusebenza kwabo. Umnumzana Mike Ndiweni ngumqondisi wale inhlanganiso ochasisa kabanzi ngohlelo lwabo lolu.
“Umhlangano lo siwuqoqe sikhangele abantu abasebenza besiya phandle kwelizwe esithi ngesikhiwa ngama informal cross border traders. Besizama ukuthi sisungule uhlelo lokukhankasa ukuthi silungise indlela abantu abasebenza ngayo nxa besiya phandle kwelizwe. Kuzaba luhlelo lweminyaka emibili sikhulumisana labe Zimra lama khansila sibona ukuthi yikwiyini esingakwenza kanye lamanye ama authorities aphathekayo kubathengisi. Sikhale futhi lamanye amazwe esizabe siwalanda sikhulumisana labo sibona ukuthi yikwiyini esingakwenza ukuthi siguqule indlela yabantu abasebenza phandle kwelizwe ibe ngcono.”
UKhansila Rodney Jele omela uWard 22 ukhuthaza abakulumsebenzi ukuthi baphatheke emihlanganweni ebakhona phansi endaweni abakuzo ukuze izikhalazo zabo zizwakale.
“Besibuyile lo Elder man Rafael Moyo ukuthi sizokuzwa ukuthi wona ama informal traders athini njalo afuna ukuthi sibayenzeleni njengama city fathers. So we acknowledge ukuthi bakhona lokuthi informal sector yiyo esibambe economy yeZimbabwe yiyo esibambe economy yakoBulawayo. So siyabaqakathekisa kakhulu sifuna ukusebenza labo lathi ukuthi sibancedise ngama projects abafuna ukuthi venture into .Lathi njenge local authority sikhangele indawo lapho okumele besebenzele khona labo bekwanise ukuthi beziphilise our plea lathi as amacouncilors yikuthi babekhona kumameeting kuground ababekhona ukuthi we plan our wards siphansi khonangale ”
Osebenza kunhlanganiso ekhangela ngenkohlakalo eyeTransparency International Zimbabwe, umnumzana Njabulo Moyo uthi bayakunanzelela ukuthi omama bacina bephatheka kunkohlakalo bezama ukuphakamisa imuli zabo.
“Siyananzelela ukuthi kulobugwelegwele obenzakalayo obugoqela ukuthi omama bacina sebesiba esimeni esinzima sokucina besebenzisa imizimba ukuze babhadale eminye imithelo efunakalayo. Lalapho betholakale bethengisela endaweni ezingekho emthethweni kucina kusiba lobugwelegwele obunengi esikubiza kakhulukazi sisithi yikudiza bezama ukuthi basukumise imuli zabo. Kodwa siyakhuthaza ukuthi uhulumende afake indlela kumbe imithando ezancedisa omama batholakale belendlela ezilula ukuthi bakwanise ukuwoda, ukuthengisa lohulumende ethole inzuzo kulokhu kuthengisa okwenzakalayo.”
Unkosikazi Pellinah Nleya ozisebenzayo uthi abanye babo bacina bebanjwa ngamandla ukubhadala ngocansi lapho bezama ukudlulisa impahla emingceleni.
“Sile challenge enkulu kakhulu njengabomama abazisebenzayo ngezandla siwoda izinto kubo Mussina siwoda izinto. Ichallenge esilayo ngeyokuthi nxa ufika eborder abantu be Zimra abala mali bafuna ukuyithola kithi thina lathi sizama ukuthi sithole leyo mali. So okwenzakalayo, njengabomama abanye bacina bethengisa imizimba, inkulu li challenge. Indawo zokuthi sigeze lokutshintshela ama pads azikho.”
Omunye osebenzela ekoBulawayo unkosikazi Gloria Shumba uthi ukudula kwezinto kuyabancidezela ekukhuliseni ibhizimusi.
“Ukuze sikwanise ukuthi sisuke kuma new stands sometimes ngifika sekusemini ama products engiwathweleyo amatamatisi lamaqanda sokufile nxa i bridge lingaphangisa liphele kungaba ngcono. Plus indawo esithengisela kiyo its not legal, njalo uyabe ule small capital, i transport iyadula ngakho inengi licina liwile ku business. Njalo omama aba selfesteem angazi kungalungiswa njani ukuthi ama vendors babonakale njengabantu.”
Uhlelo lwabeBulawayo Vendors and Traders Association abalusungulayo bathi luzaba ngolweminyaka emibili, bekhankasela ukuthuthukisa umsebenzi wabaphila ngokuthengisa ngokukhulumisana labakahulumende enhlangothini ezinjenge Zimbabwe Revenue Authority kanye lababona ngokungena kwabantu elizweni abe Immigration.
