AbeBotswana bakhonona ngabeZimbabwe abangena elizweni okungekho emthethweni, ibethesa umlandu wokumemethekisa imikhuhlane yezifuyo kanye lezilimo, isithi lokhu kufaka engozini ikusasa sesiphala sokudla salelolizwe.
Ugatsha lwezokulima kweleBotswana luthi alujabuliswa yindlela izizalwane zeZimbabwe eziletha ngayo imikhuhlane yezilimo kanye lezifuyo elizweni lelo.
Umqondisi wogatsha lolu, umnunzana Galeitsiwe Ramokopane uthi abeZimbabwe abangena elizweni lakhe okungekho emthethweni yibo ababuya bethwele imikhuhlane le.
URamokapane uthi imkhuhlane yezilimo kanye lezifuyo iyingozi kukusasa lokudla kweleBotswana. Uthi baqhubeka besiba lomkhuhlane womlomo lamasondo, ifoot and mouth kuzifuyo kanye lezibungu sezithelo ezingena zivela eZimbabwe labazothengisa izilimo ezifana lemibhida.
Umumo womnotho oqhubeka usiba mubi okumangalisayo, yiwo obamba ngamandla abantu beZimbabwe ukuthi bazibone bezothengisa ngitsho lembhida ezitaladeni zeBotswana.
Unkosikazi Grace Chiwelu uthi isimo ekhaya yiso esibabamba ngamandla ukuzothengisa eBotswana.
Umbono kamnumzana Japhet Ncube osebenza eGaborone yikuthi udubo lolu lulingana lohlupho lomnotho elizweni eZimbabwe, esithi alusoke luphele ngaphandle kokuthi isimo sezweni lelo sibengcono.
Ngokunjalo, iBotswana ithi izafaka amanyathelo aqinileyo ukwenqabela ukumemetheka kwemikhuhlane yezifuyo lezilimo. Ithi wonke umuntu ongena elizweni kuzamele akhuthuzwe imphahla yakhe kudingwa ukuthi kathwalanga izilimo kumbe inyama evela eZimbabwe.
Kodwa uNcube uthi iBotswana ingabe isilwa impi engeke yayinqoba ngoba ngaphambilini beyehlulwe ngabeZimbabwe abangena elizweni okungekho emthethweni.
IBotswana ithi ilethemba lokuthi ukusebenzelana phansi kwenhlanganiso ebona ngokumemetheka kwemikhuhlane emhlubulweni wangezansi kwezwekazi leAfrica abalisa aweBotswana, Namibia, Zambia and Zimbabwe kuzanceda kuloludaba.
Inhlanganiso ebona ngezokulima lokudla eemhlabeni jikelele eye Food and Agriculture Organisation, iphathisa amazwe womane ngemali ukulwiswa imikhuhlane le.