Usibalukhulu webhanga elikhulu lelizwe, eleReserve Bank of Zimbabwe, uMnu. John Mangudya wethule umbiko othi uhlangothi lwaleli bhanga, lwabacubunguli endabeni zemali, olweFinancial Intelligence Unit -FIU, selufumene abephula umthetho wokuhanjiswa kwemali elizweni besebenzisa inkundla zebulenjini ezinjengaboWhatsapp lezinye.
AbeFIU bahle bethula uluhu lwamabizo abantu laba kanye lenombolo zabo zikamakhalekhukhwini.
Amabhanga amancane, kanye labakumsebenzi wokuqhutshwa kwenhlelo zemali kumakhalekhukhwini labo bahle balaywa lokuphiwa imvumo yokumisa ukuhamba kwemali ebantwini laba abatholakale betshintsha imali ngokungekho emthethweni lokuvala ama accounts abo.
UMangudya uthi ukwethulwa kwamabizo lawa kwenziwa emizameni yokwenqabela imisebenzi yokutshintshwa kwemali ngendlela eziphambana lemithetho yelizwe lokuhlanjululwa kwemali eyabitholakale ngendlela ezingekho emthethweni i-money laundering.
Ele Zimbabwe selile minyaka libhekane lodubo lokuswelakala kwemali yakwamanye amazwe kusukela ngesikhathi ilizwe libuyela ekusebenziseni imali yelizweni eyamaRTGS, ngemva kokusebenzisa idollar leMelika. Ingcwethi zezomnotho zithi okwenziwa yiRBZ akuncedi ngalutho ngoba ilizwe alilayo imali yakwamanye amazwe, ukubamba ngamandla abantu ukusebenzisa imali yelizweni akusebenzi ngoba kunje abaninibhizimusi basenzisa intengo yesisindo sokutshintsha imali emkhambo omnyama hatshi oweRBZ.
Kunjalo nje, osomabhizimusi bakoBulawayo bakhala ngodubo lokusilela kwemali yakwamanye amazwe, besithi okwenzakalayo kwenza amabhizimusi abo adonse nzima njalo sebebanjwa ngamandla ukudinga iForeign Currency emkambo omnyama.
Osomabhizimusi abanengi baleli dolobho bathi ngokuhlaselwa kwamazwe womhlaba okugoqela ele Zimbabwe, lubhubhane lweCoronavirus umnotho welizwe obuvele umadolonzima, uhle wama ndawonye ungasathuthuki, ngenxa yezizatho ezithsiyeneyo ezigoqela ukusilela kwezethekeli zakwamanye amazwe, ukuvalwa kwamanye amankampani, ukusilela kwemali yakwamanye amazwe lokunye.
Umnumzana Effort Ncube umqondisi weNational Consumer Rights Association uthi ukuze umnotho uthuthuke yikuthi kube lemali evela kwamanye amazwe.
“Isimo sibi esomnotho ukuthi umnotho, ukuthi umnotho awusebenzi kahle ubona ngokusweleka kwemali yangaphandle okuthiwa yiforeign currency. Nxa ngabe ama industry esebenza ngendlela efaneleyo letorism ikhona kule investment efaneleyo abantu bangaphandle labaphakathi behlanyela izimali kulula ukuthi imali yangaphandle itholakale. Ukuswelakala kwayo kwenza ukuthi industry ingasebenzi ngrndlela efaneleyo abantu bangatholi imisebenzi lezinto zidule okwedlula lokhu ade kuzabayikho khona nxa iforeign currency itholakala ngakho ke nxa ingabe iforeign currency ingatholakali izinto zizaqubeka zidule economy ayisoze ivuke.”
Unkosikazi Sane Ndebele olebhizimusi esakhulayo uthi amabhizimusi abo abulawa ngumkambo omnyama.
“Njengathi abamabusiness amancane kunzima kakhulu kithi ngoba yonke into siyithenga ngeforex so ngaphathisa siyabe sithengisa ngeRTGS lokhu kuyasibulala angiboni umkhonomi utshintsha ngoba kunjalo iForex nxa sesiyidinga sesithengiselwa ngosphatheleni okuyikho okunye okusibulalela economy iblack market.”
Umnumzana Meluleki Mlala omunye wabosomabhizimusi uthi ukuthi bathole imali yakwamanye amazwe kunzima.
"Ama business ethu singakhangela kuliminyaka leyi isilokukhathazeka kakhulu ngoba iforex ayibambeki.lndlela ezazisilethela iforex lula ngeCovid leyi zavaleka akula tourism abantu abasavakatshi besiya kwamanye amazwe lokhu singathi yikho okunye osokubulele economy yethu.
Ibhanga elikhulu lelizwe ele Reserve Bank of Zimbabwe lithi lizaqubeka lizama ukuthi kungabi lokukhuphuka kwentengo mahlayana ukuze isimo somnotho sibe nganeno.
Ekhuluma emhlanganweni obukhona ensukwini ezimbalwa ezidluleyo umsekeli kamqondisi obona ngokuphenya ngezenotho ebhanga leRBZ uDr Nebson Mupunga uveze ukuthi ibhanga le Apex bank lisebenza nzima ukuthi limise ukukhuphuka kwentengo ngoba kungalungelanga intuthuko yomnotho welizwe.