Inhlanganiso ebona ngokulondolozwa kwamalungelo oluntu emhlabeni jikelele, eye Amnesty International, isiveze ukukhathazeka ngokwehluleka kweZimbabwe ukusebenzisa isisekelo sombuso esitsha ngokugcweleyo kanye lokuqhubekela phambili kwayo isephula amalungelo oluntu. Lokhu kuphume embikweni walinhlanganiso womnyaka ka 2015/16, ewethule eJohannesburg eSouth Africa, ngoLwesithathu.
Ngokutsho kweAmnesty International, iZimbabwe ibe ngelinye lamazwe asesibangeni sokwedlula ikhulu lengxenye-161, aqhubeke esephula amalungelo oluntu emnyakeni ka 2015 kuzofika lumnyaka.
Esethula umbiko walonyaka kwabezindaba eJohannesburg, umsekeli kamqondisi wale inhlanganiso emazweni asezansi yekwekazi leAfrica unkosazana Muleya Mwananyanda uthe ukwehluleka kweZimbabwe ukusebenzisa ngokugcweleyo isisekelo sombuso esitsha yikho okuqhubeka kubangela ukuthi amalungelo avikelekileyo kulesi sisekelo aqhubeke esephulwa.
UMwananyanda uthi amapholisa aqhubeka esebenzisa imithetho eyenqabela inkululeko ekuqqhubeni imihlangano lekwethuleni imibono ngokukhululeka kungakhathalekile ukuthi abakwenzayo kuphikisana lalokho okukusisekelo esitsha. Okungumbono ogcizelelwe yintathelizindaba ye Zimbabwe uNdumiso Mlilo.
"Ngabe isisekelo lesi siyasetshenziswa ngokugcweleyo elizweni ngabe ilungelo loluntu elinengi liyahlonitshwa ngoba kulesi isisekelo esitsha lesi siyabona kulokuthi kumele kube labo human rights commission lokunye okunengi esibona ukuthi kuzaletha ukuhlonitshwa kwelungelo loluntu okunengi ngokugcweleyo".
Linhlanganiso ithi ukubotshwa kwentatheli zindaba eZimbabwe kuqhubekele phambili nyakenye kungakhathalekile ukuthi lezi intatheli bezisenza umsebenzi wazo zingephulanga mthetho.
Omunye wabaqondisi bale inhlanganiso kweleSouth Africa unkosikazi Mpilo Buthane, uthi bakhathazekile ngeZimbabwe loba nje sekukhona okunye ekwenza ngcono.
"EZimbabwe yebo ukucindezelwa kwamalungelo abantu kusekhona. Amalungelo abantu abalwela amalungelo abantu esibabiza ngokuthi ama human rights defenders, asasengcupheni namanje. Luselude loba uhambo okusafanele luhanjwe eZimbabwe kodwa esingakuncomanje kancane okwenzekile kulo umnyaka odlule yikuthi uhulumeni uwuqedile lomthetho okhuluma ngokuthi kutshadiswe amantambazana asesemancane".
Ukwenqatshelwa kwabamabandla aphikisayo lenhlanganiso zomphakathi ukuqhuba imihlangano loba ukutshengisela ngenye yezinto esolwe yile inhlanganiso eZimbabwe.
Unkosikazi Buthane uthi ukwehluleka kukahulumende ukudinga intatheli eyanyamelele nyakenye, u-Itai Dzamara, ngezinye zezinto ezikhombisa ukuthi isimo sisasesibi kwezokuhlonitshwa kwamalungelo oluntu kulelozwe.
"Intonje esiyicela kakhulu kubohulumeni la esibona khona izihlukumezo zabantu ngamapholisa sithi nalokho akulwiswane nakho. Njalo lalapho esibona khona ukuhlukunyezwa lokunyamalala kwama Human rights defenders sithi lokho uhulumende sisebenzisane laye kanye lemphakathi ukuthi kuqedwe lokho".
Linhlanganiso ithi lobanje sekukunengi esikukhuthazile ukuthi kwenziwe eZimbabwe kodwa kungalalelwa, izaqhubekela phambili iqaphe isimo njalo ikhuthaza ukungenela kwenhlanganiso ezifana leye SADC.
