Ingcwethi kwezamalungelo oluntu zithi amazwe awezwekazi leAfrica kumele aqinise imithethwandaba emazweni awo abelakho ukuletha ukuthula kanye lezigwebo kunkokheli edala amacala anduba kukhulunywe ngokuphuma ngaphansi komthetho wenkantolo enkulu yomhlaba.
Ingcwethi lezi zithi isinqumo sokuthi izwekazi leAfrica liphume ngaphansi komthetho womthethwandaba wamazwe womhlaba owe enkulu yomhlaba sigijinyiswa zinkokheli ezesaba ukuthi icala kaliboli kungakho kulosuku lapho lazo zizabizelwa kulowo mthethwandaba ukuzabhekana lamacala akudala.
Udaba lolu lokuxoxisana kukazulu lulandela isehlakalo ezansi yeAfrica lapho umkhokheli weSudan uMnumzana Omar Al Bashir ubedinga ukubotshwa yinkantolo le.
Inhlanganiso yamazwe akuzwekazi leli iAfrican Union ekhokhelwa ngumongameli wakuleli uMnumzana Robert Mugabe isixoxisana ngokuthi amazwe la aphume kunkantolo le angavumi ukumiswa phambi kwayo besithi ivele idinga ukujezisa abakhokheli beAfrica kuphela ifuqa injongo yamazwe asentshonalanga angafuni kubona iAfrica izibusa.
Ekhuluma emhlanganweni obizwe yiBulawayo Agenda kanye lamaqgwetha alwela amalungelo oluntu, umqondisi wenhlanganiso yamaqgwetha la, iZimbabwe Lawyers for Human Rights, uNkosazana Irene Petras, uthi inkokheli ezihanjiswa eICC ngeziyabe zivela emazweni atshengisa ukuthi ayehluleka ukuzibopha azimise phambi komthethwandaba esetheswa amacala awadale kuzulu.
Abantu balelungelo lokuthola isinqumo somthethwandaba, kungakho uthi nxa amazwe la esehluleka abantu kabavunyelwe ukuphanyeka amacala la emthethwandaba olakho ukuwathetha kungela kwesaba.
Ekhuluma emhlanganweni lo, ingcitshi kwezombusazwe, uDr Gorden Moyo, uthi udaba lokuphuma kunkantolo le luqhutshwa zinkokheli ezilamacala ezazi ukuthi icala kaliboli njalo okulempondo akufihlwa emgodleni kungakho zihlalele evalweni ukuthi koze kubafice labo.
Uthi liqiniso ukuthi esikhathini esinengi kukhanya angathi linkantolo ikhangela inkokheli yeAfrica nanku akula okwenziwayo ngamazwe eSyria, iIsrael kanye le Palestine kodwa lokhu akutsho ukuthi inkokheli zeAfrica zinindwa nje ngodakwa kodwa zibotshelwa amacala eziwadalileyo ngempela.
Inkokheli yeAfrican Union, umongameli wakuleli, uMoyo uthi udinga nje ukuvala olwakhe udaba lawakhe amacala ngokungenisa izwekazi lonke kudaba lwakhe.
UMnumzana Mmeli Dube ngumqondisi weBulawayo Agenda eqoqe lingxoxo ibambane leZLHR. Uthi kuqakathekile ukuthi uzulu axoxisane ngalezizindaba ngoba izinqumo akumelanga zithathwe yinkokheli iyodwa ngoba ibambe lezi zikhundla ithunywa ngabantu. Uthi khona vele isilonda sizwiwa ngolaso kungakho abantu yibo abalelungelo lokutsho ukuthi amacala adalwe kubo athethwe ngubani ngaphi.
Okwakhathesi kulamacala angamatshumi amathathu lambili – 32, aphambi kwenkantolo ye ICC wonke angawenkokheli yeAfrica. Ilokhu yaqala ukusebenza, linkantolo seyathetha yaqeda amacala amabili aka Charles Taylor owayengumongameli we Liberia lomuyi uMilosevic Slobodan owayekhokhela iSerbia/Yugoslavia.