Kulabazali abanengi abathi abantwana banamuhla asebekhulile behluleka ukubanakelela ngoba sebephila bodwa. Kodwa abatsha bathi labo bathwele amagabha avuzayo ngenxa yokuswelakala kwemisebenzi njalo lokunye okubasindayo.
Abazali abakhonona ngokungananzwa ngabantwana babo bathi kunengi abatsha abangakwenza ukuze bebathengele ukudla, izigqoko lokunenginengi abakufunayo. Omunye wabazali abakhala ngokwenziwa ngabatsha nguNkosikazi Madeline Ngwenya ohlala eMpopoma koBulawayo.
“Thina asifuni mali yabo yonke, hatshi, kodwa sithi khumbula lapho ovela khona. Thina sibakhulisa akutsho ukuthi lathi sasingawomelwanga; kwakubheda okuzwayo, kodwa sabalahla yini? Ngithi ebantwaneni bethu, bhekani emuva lingasikhohlwa ngoba lilakho ukuphumelela nxa lathi singathaba.”
Banengi abazali abakusimo lesi. UBhekimpilo Ncube osakhulayo ohlala kwele South Africa uthi baqinisile abazali ngoba banengi abatsha abangazi abakwenzayo.
“Kulezinsuku sesizinika ezinye indleko ezingafanelanga. Sesigcwele kuma social media, njalo sithenga izinto ezingelamsebenzi empilweni zethu, ngoba sikhangela ukuthi abanye bethu bayenzani labo. Kanti ke, ngabe sithatha izimali leziyana sincedise abadala loba kunzima nje. Ngibona ingathi bengathaba kakhulu.”
UMqoqi Ncube osakhulayo okhokhela abatsha kubandla leMethodist Church in Zimbabwe koBulawayo uthi kwesinye isikhathi abazali bafuna okungeneliswa ngabantwana.
“Sonke siyabona ukuthi umnotho welizwe awumanga kuhle, kodwa bakhona abazali ababuya bekhangelele okukhulu kakhulu, okwenza ingani bafuna ukubhadalwa ukukhulisa abantwababo. Bayakhohlwa ukuthi impilo yanamuhla itshiyene leyayizolo endabeni zomnotho. Kodwa iqiniso yikuthi inengi labantu bale sifiso kodwa abenelisi.”
Loba bekhala abazali, bakhona abanye abantwana abaphandela abazali ukudla lokunye okuqakathekileyo. UMerjury Mlambo uzama ngamandla wonke ukuze umzali wakhe athole ukudla.
“Umzali wami angimkhohlwanga ngoba ngingathola imali kuphela, ngilakho engimthengela khona- kungaba ngamasofa, iTV lokunye. Ngikwenza lokhu njengendlela yokubonga ukungikhulisa akwenzileyo. Kungaba kuncane kodwa ngifisa ukumthabisa sonke sikhathi.”
UMnu. Methuseli Moyo umzali ofundisa ekolitshini leNational University of Science and Technology uthi kulabantwana abalungileyo labangamahlongandlebe.
Impilo isinzima ebantwaneni, okubuya kube nzima ukuthi benelise ukusiza abazali. Kodwa bakhona abantwana asebethatheka ngomhlaba, belibale abazali. Abanye bathi bengaya emazweni, baginywa ngawo, bengasakhangeli lapho abavela khona. Kuzobakhona abafisayo kodwa behlulwe ngumumo. Ngibona ukuthi sokuhamba ngomuntu ukuthi unjali, lemvelaphi yakhe.”
Okwamanje kulabatsha abalokhu behlala labazali ngenxa yokuswela imisebenzi. Abatsha laba badingelwa ukudla ngabazali abahluphekayo labanye abalemali.
Forum