Abatshutshisi beMelika sebethule imininingwane emitsha phezu kwamacala abawethesa owake waba nguMongameli walelilizwe uMnu Donald Trump, awokuzama ukwalela embusweni lokuphehla udlakela ngomnyaka ka2020 lapho anqotshwa khona nguMongameli Joe Biden.
Lanxa inkantolo yeSupreme Court yanquma ukuthi kulamanye amacala uMongameli weMelika angeke awetheswe nxa ewadale esehofisini, abatshutshisi bathi uTrump kumele athonisiswe ngoba amacala la wawadala esenza okwekhanda lakhe hatshi okuhambelana lomsebenzi wakhe.
Ukwethulwa kwemininigwane le kucunule uTrump, yena othi abatshutshisi bazama ukungcolisa igama lakhe phambilini kokhetho lukaMongameli oluzaqhutshwa mhlaka 05 ngenyanga ezayo lapho azangqikilana khona loNkosikazi Kamala Harris omela ibandla lamaDemocrats. UTrump yena umela ibandla lamaRepublicans.
Ingcwethi kwezombusazwe elandela okwenzakalayo eMelika uMnu Effie Dlela Ncube utshele iStudio 7 ukuthi kungelani lamacala la, akucaci ukuthi ngubani ozanqoba kukhetho lolu.
Forum