Abatshayeli bendizamtshina ze Air Zimbabwe abaqalise ukukhalala umsebenzi ngoLwesihlanu olwedluleyo, bathi kabasoze babuyele emsebenzini baze bathole iholo lama allowances kaNhlangula loNtulikazi.
Abatshayeli laba babikwa becelwe emhlanganweni ngoMvulo ngabaqondisi be Air Zimbabwe ukuthi babuyele emsebenzini ukwenzela ukuthi inkampani le ithole imali yokubabhadala.
Kodwa-ke bayalile besithi kumele inkampani le idinge imali yokubaholisa kuhulumende njengalokho ekwenze ngo Mabasa.
Omunye wabaqondisi be Air Zimbabwe ose Europe uMnu. David Mwenga uthi abatshayeli bendizamtshina laba lokhe bekhulumisana labaqondisi benkampani ngeholo lama allowances abo eHarare.
UMwenga uthi kulamakhulu amabili abantu eBhilithane abangazi ukuthi benzeni njengoba zonke indizamtshina ze Air Zimbabwe zingasaphaphi ngenxa yokukhalala umsebenzi okwenziwe ngabatshayeli laba.
Unkosazana Nothando Ndlovu ose Milton Keynes kwele Bhilithane uthi kulemuli ekade kumele iyefika ekhaya ngempelaviki esithwele nzima njengoba lamaphepha abo okuhlala eNgilandi engasabavumeli ukuthi babe kulelolizwe.
Ingcwethi kwezenotho uMnu. Masimba Kuchera uthi ibandla le ZANU PF yilo elenza ukuthi kube lokuxokozela kunkampani ye Air Zimbabwe okumele ukuthi ngaseyathengiswa kudala.
