Abasakhulayo eZimbabwe ababhekane lesimo esibi somnotho bathi indlala enkulu lonyaka ilakho ukuphazamisa imizamo yabo yokuzidingela ukudla.
Abatsha laba abayisilinganiso sokungamatshumi ayisithupha ekhulwini - 60% bebevele bephila nzima bekhangelele ukuba kuzakuna izulu belime bethengisele uzulu okutshiyeneyo. Kodwa kunzima lonyaka njengoba kulabantu abedlula izigidi ezintathu – 3,7 million eZimbabwe okukhangelelwe ukuba bazaholiswa ukudla nguhulumende ngenxa yokungani kwezulu. Inengi labo kalisebenzi ngoba amafekithali amanengi avalwa eZimbabwe.
Omunye wabasakhulayo ohlala eZhombe esigabeni sika sabhuku uMlotshwa uThembani Dungeni uthi ubhekane lendlala enkulu ezakwenza kubenzima ukuthi aziphilise.
ULiberty Mlilo laye ohlala eZhombe isimo sesisibi okokuthi imali yonke abeyigcinile ukuze adinge icence lokutshayela imota usezayisebenzisa ukuthenga impuphu.
UHerbert Majahana ohlala eHarare uthi indlala yalonyaka imi kubi ngoba kuzamele athumezele umama wakhe ohlala eNkayi imali yokuthenga impuphu kulokuthi agcine imali yokuzithuthukisa.
Owesifazana osebenza kunkampani ephekayo eHarare, uNkosazana Pretty Dube, uthi kaselathemba lokuba umnyaka ka2024 uzamlethela impilo engcono ngoba kumele asebenzise imali ayitholayo.
Kodwa omunye osakhulayo ozisebenzayo, uRegan Sibindi, uthi kasoze avumele indlala yalonyaka ukuba imbisele emuva esithi uzaqala ukuthengisa ukudla ngoba esebone amathuba ngenxa yendlala.
Abenhlanganiso ezizimeleyo bathi kumele uhulumende aze lendlela ezehlukeneyo zokuncedisa abatsha lonyaka. Lokhu kugcizelelwe nguNkosazana Sharon Maphosa wenhlanganiso eyeYouth Arise othi kumele uhulumende abe lesikhwama sokusiza abatsha ngesikhathi sendlala.
Ingcitshi kwezomnotho osebenza kunhlanganiso yeLabour Front, uMnu. Peter Khanye, uthi kuzakuba nzima ukuba uhulumende akhangele abatsha kuphela ngoba kuvele kulodubo olukhulu lwendlala ehlupha wonke umuntu.
Kodwa isiphathamandla sikahulumende esibona ngomsebenzi wabatsha kuhulumende ekuhlangothi lweZimbabwe Youth Council, uMnu. Brian Nyagwande, uthi uhulumende uyazazi indubo zabatsha njalo uzakuza lamacebo okubaphathisa.
UMongameli Emmerson Mnangagwa ngeviki ephelileyo ubikele umhlaba wonke ukuba eleZimbabwe libhekane lendlala enkulu ngakho-ke ucele uncedo ukuze kudingelwe abalambayo ukudla eZimbabwe. Inhlanganiso ezizimeleyo ezigoqela eyeWorld Food Program zithi zizazama ngamandla wonke ukudingele eleZimbabwe ukudla loba lidingele ukudla amanye amazwe.
Okwamanje akukaziwa ukuba sokutholakale malini eyokunceda uzulu kulandela ukwethulwa kombiko nguMnangagwa owokuthi ukoma kwalonyaka solukuzinga lweNational Disaster.
Forum