Abatsha eZimbabwe bathi bayahlupheka okumangalisayo kodwa kungabehlula ukuba betshingisele emigwaqweni ukuze uhulumende kaMongameli Emmerson Mnangagwa alungise okunye okubakhathazayo njengalokhu okwenziwa kulez'insuku ngabasakhukayo kwele Kenya.
Abasakhulayo bathi badla imbuya ngoluthi kwele Zimbabwe ngenxa yesimo somnotho esibi abathi siphazamisa ikusasa labo.
Abakhulume leStudio 7 bathi imfundo yabo kayisizi lutho ngoba kabalamisebenzi njalo kabawatholi amathuba emisebenzi. Banengi abatsha abadabuke inhliziyo. Omunye wabo nguThemba Mazwi owafunda ekolitshini leMidlands State University ngomnyaka ka2015.
"Mina ngaqeda isikolo ngomnyaka ka 2015, kodwa angikaze ngisebenzi. Sengisesaba ukuba izazi yenele iminyaka yokudla ipension ngisendlini, elakusasa lethu limi manzonzo njengatsha ngoba akula mathuba emsebenzini."
UDevilious Sibindi owafundela ukukanika izimota ukusimo esifanayo.
"Sakhula sitshelwa ukuba kumele senze imsebenzi yenzandla, yikho engakwenzayo ePoly kodwa lanamhlanje kangila msebenzi ngoba akula mankampani aqhatshayo. Bonke bathi 10 years experience."
Loba kunjalo, abanye abatsha bathi kunzima ukuzilwela eZimbabwe okufana lokutshengisela emigwaqweni okwenzakala kwele Kenya lapho abasakhulayo ababambe ngamandla uMongameli William Ruto ukuba alahle umthetho obesokumelelwe wethulwe nguhulumende obuzakhuphula imithelo, intengo yokudla lokunye.
UGracious Nyathi osakhulayo owe Harare uthi kunzima ukukwenza lokhu kuleli ngoba uhulumende uncidezela uzulu.
"Kulilungelo labatsha ukutshengisela kodwa ungakhangela okwenzakale eZimbabwe kodwa uhulumende wethu ulocuku olumangalisayo bengakhona ukubulawa lokulinyazwa baphathi komhlane lembeleko."
UZibusiso Dube isakhamuzi sakoBulawayo uthi kumele kube lendlela zokutshengisela ezingela dlakela ngoba elakusasa labo limi manzonzo.
‘’Kumele basebenzise amapeaceful methods awokutshengisela okufana lokusebenzisa ubulembu beinternet nsuku zonke beze bezwakale nxa bengangena ezitaladeni kababuthanisane ngobunengi hatshi ixekana’’
Kulabanye njalo abafisa ukutshengisela emigwaqweni besithi benza kahle abatsha kwele Kenya asebebambe ngamandla uRuto ukuba amise umsebenzi abaphathintambo bakahulumende okuthiwa kabaqhubi kuhle umsebenzi. URobert Sithole uthi kunengi abakufunda kokwenzakala eKenya.
"Abatsha kumele sithathe umzekeliso walokho okwenzakala eKenya silwele amalungelo ethu. Akula omunye umuntu ozasikhulula. Sokumele sibone ukuba ububi lobu siyabulwisa singene emgwaqweni sitshengisele."
UMatthew Magama ohlala eZhombe uyakusekela lokhu.
"Abatsha kumele sifunde ukuphatheka kwezombusazwe. Abatsha kwele Kenya basinikeza isibonelo ukuba nxa sifuna impilo yethu ibengcono kumele sivuke sizenzele."
Kodwa uJohnson Moyo osakhulayo okubandla leZanu PF uthi uhulumende uyazazi inhlupho zabatsha ngakho-ke akumelanga becabange ngokwenzakala kwamanye amazwe.
"Uhulumende uyazazi indubo zabatsha kuleli. Akudingakali ukuba batshengisele. Kumele benze okusemandleni abo ukukhulumisana lohulumende indubo zabo zize zilungisiswe."
Uhulumende weZimbabwe wabulala abantu abayisithupha ababezihambela eHarare lababetshengisela ngomnyaka ka2018 bekhonona ngokuphuza kokwethulwa kwempumela yokhetho lukamongameli. Abanengi abatsha batshi kusakude ukuba betshengisele emigwaqweni ngoba besaba ukubulawa nguhulumende kaMnangagwa.
Forum