Abathengi labasebenzisa imitshova bathwele nzima ko Bulawayo kulandela ukuqhubeka kokwehla kwamandla eRand lakwele South Africa eselehliswe amandla ngabantu abangasafuni ukulisebenzisa.
Emkambo wensitha idola leMelika selithenga amarand angamatshumi amabili-R20 kodwa wona amandla alo uqobo emabhanga amaRand alitshumi lane ethenga idola leMelika.
Abathengisa impahla ezitaladeni labo babikwa sebengasemukeli iRand. Abemitshova bona babikwa sebekhweze imbadalo yayafika kumaRand alitshumi-R10 kuhambo lunye.
UChris Gande weStudio Seven uxoxe lengcwethi kwezombusazwe, uMnu. Ambrose Sibindi oyisiphathamandla senhlanganiso yezakhamizi zakoBulawayo, i Bulawayo Progressive Residents’ Association.
USibindi uthi abanengi sebenanzelele ukuthi bengahlala belama Rands ayenelisa ukuvuka isisindo sesehlile ngelanga elilandelayo.
"Loludubo selufinyelele lasema bank ngoba asesala ukwamukela ama rand, ikakhulu ama coins sebefuna ama notes. Khona lokhu kuyatshengisela ukuthi engxenye sizafika isikhathi sokuthi lama bank ayabe engasalamukeli irand," kutsho u Sibindi.
Wengezelele esithi abanengi abasebenza kwele South Africa sebebona kungcono ukuthi baqale bathenge amapula akwele Botswana nxa besiya eZimbabwe ngoba lokhu kuzenza abathenga impahla kwele Botswana balithenge ipula.
Ephendula umbuzo wokuthi kanti kungani intengo yempahla ingehli njengokuwa kwamandla eRand uSibindi: "Ungananzelela eZimbabwe kulomkhuhlane ongeke wawuzwisisa ungahamba eSouth Africa le rand yonaleli eliwileyo uyathenga izinto ezinengi ezesabekayo ... Konke ledola lakhona lalo uyathola lingela mandla."
