Inkokheli yenhlanganisoi yabaphila ngokuthengisa ezitaladeni, eye National Vendors Union of Zimbabwe ( NAVUZ ), itshengisele yafola ezitaladini zeHarare ngoLwesine isola isiphatho samapholisa, abathi athatha impahla yabo kanye lokubahlawulisa imali yokufumbathisa..
Lawo ngamalunga phose amatshumi amabili awenkokheli ye NAVUZ, abesenza amaslogan ngesikhathi befika egumeni leTown House belencwadi yezikhalazo zabo, bekhokhelwa komgcinisihlalo walenhlanganiso uMnu. Sten Zvorwadza.
UZvorwadza uthi bafuna uphele umkhuba wamapholisa kamanisipala wokubahlukumeza ngendlela ezehlukeneyo ebathathela imali ngokubafumbathisa sikhathi sonke.
UMnu. Tinashe Sibanda ongomunye wabaphila ngokuthengisa izicathulo edolobheni leHarare ube khona laye kulokhu kutshengisela. Ke sizwe ukuthi utheni:
USibanda wengezelele esithi ufisa umanisipala azihluzisise izikhalazo zabo ngoba ezinye izehlakalo sezike zafika endlebeni zenkokheli yezombusazwe.
Osaphethe isikhundla sikaMayor we Harare UCouncillor Wilton Janjazi nguye oyamukele incwadi yezikhalazo zabakade betshengisela laba.
UJanjazi uthembise ukuba bazahlala phansi njengomanisipala bahluzisise izikhalazo zabathengisa ezitaladeni laba ekubuyeni kuka Mayor Benard Manyenyeni emsebenzini ngoMvulo kuviki ezayo.
Osaphethe uhlangothi lokukhulumisana lozulu kumanisipala, uMnu. Michael Chideme uxwayise abantu laba ukuba bengabovuma ukuhlawuliswa imali yesifumbathiso ngoba lokhu yikwephula umthetho. Wengezelele esithi babophanga babike kuziphathamandla zikamanisipala abenza lokhu hatshi ukulindela ukuba umkhuba lo ufike kusibanga esibi.
