Abaphila ngokuthengisa impahla etshiyeneyo koBulawayo bathi kumele uhulumende abadingele imali yokuthi baziphilise ngesikhathi ilizwe liphansi kohlelo lokuvalela uzulu ezindlini olweCOVID-19 lockdown.
Bathi kumele bathole amatshumi ayisikhombisa lanhlanu zama dola eMelika – US$75 ngenyanga njengalokhu okutholwa yizisebenzi zikahulumende.
Ophila ngokuthengisa, uNkosikazi Jotina Lusinga, uthi uhulumende wabanika kanye imali yokuziphilisa.
“Siphila ngokuthenga sithengisa njalo uhulumende wasipha kanye amakhulu ayisikhombisa amadola akuleli. Leyomali ayeneli ukusiphilisa yenela ukuthenga isaka lempuphu elilodwa kodwa uhulumende wayethembise ukuba uzasinika limali iCOVID ize iphele.”
Omunye njalo ophila ngokuthengisa, uNkosikazi Debra Mukasa, uthi labo kumele bathole uncedo phansi kwesikhwama se-Cushioning Fund.
Umqondisi weBulawayo Vendors and Traders Association, uMnu. Michael Ndiweni, uthi lonyaka abakayitholi imali abayithenjiswa nguhulumende.
“Imali ethenjiswe uzulu asikayiboni siyibale emaphepheni ngitsho lamabizo abazathola asikawatholi kumnyaka odlule uhulumende uphe amakhulu amadola ayisikhombisa enela ukuthenga isinkwa kuphela. Kulabanye abaqale ukuthengisa ngemva kokuba abanye sebetholile labo abakatholi lutho njalo lonyaka uhulumende kakabatholisi lutho abantu abaphila ngokuthengisa. Siyacela ukuba uhulumende abancedise.”
Olwela amalungelo oluntu, uMnu Effie Ncube, uthi abantu abathengisayo bayahlupheka uhulumende kabanaki.
“Uhulumende lokhe eveza ukungabi lenhliziyo yozwelo lokubusa kahle lokhe eveza ukuba nguhulumende ongelabantu enhlizweni. Abantu bayahlupheka abakade bethengisa izinto zabo emigwaqweni bavalelwe ukuthi bathengise, abalamali yokudla eyerent leyokuthi babhadalele abantwana esikolo. Zonke izinto ziyabahlupha uhulumende ubabeka eceleni kabanaki kumele anakekele amacivil servant lamavendors bonke abantu kumele bangene kulolohlelo.”
Umphathintambo obona ngezamabhizimusi amancane laphakathi laphakathi, uNkosikazi Sithembiso Nyoni, uthi isikhwama semali ephiwa abantu lugatsha lukahulumende olweSocial Welfare yiyo ebachazela ukuba kulemali kuleso sikhwama, ugatsha lwakhe lube selubapha uluhlu lwabaphila ngokuthengisa ukuze babelwe leyo mali.
Okwamanje uthe yena lokhu ekukhefu ngakho-ke ubengakezwa ukuthi kulemali na kuleso sikhwama engancedisa abaphila ngokuthengisa.
