Ukungalandelwa kwemithetho yezokuthengiselana lokulungiswa kwezinto sokubangela ukuqilibezelwa kwabathengi osokusiya kusanda ngabalungisa kunye labazithengisayo. Lezi zinto zigoqela okudliwayo okuyinto esisesatshelwa ukuthi ingafaka impilakahle yabantu engozini.
Ukuthengiswa kwezinto ngaphansi kwezilinganiso zazo kunye lokubhalwa kwezilinganiso ezingayisizo emaphakethini agoqela izinto ezithengiswayo kuya kusanda kwele Zimbabwe uzulu engananzelele.
Endaweni ezifana le mkambo weMbare lokhu sokuyinto esibhahile kuthengiselwa abantu abahambayo besiya emaphandleni izinto ezikusimo esingalunganga.
Umnumzana Admire Zaya wenhlanganiso yezakhamuzi ze Chitungwiza uthi umkhuba lo utholakala kuyoyonke indawo usiya usengezelela.
Uthi sokula ma tuckshop labantu makhaza asebethengisa izinto ezifana le rice isemaphakethini abhalwe isisindo se1kg yona ingama grams angamakhulu amahlanu nje kuphela-500g kodwa ithengiswa ngentengo ye 1kg ethi lokhu kukhanya sokusabalala kubangelwa yimizamo kahulumende yokuthuthukisa abensundu kwezomnotho osokubangela ukulungiselwa kwezinto kundawana ezitshiyeneyo ezingekho emthethweni kugoqela lasezindlini njalo kubangela ukwanda kwabantu asebephila ngokuthengisa bosiya order endaweni ezinje.
U Zaya uthi uhulumende kumele engenele ephathise abantu ngoba lgatsha lwe standards association lukhanya lungesenelisi ukubona konke lokhu okenzakalayo.
Ugatsha lwezokuthengiselana luhlala lukhipha imbiko yokuxwayisa uzulu, abalamafekitali alungisa izinto, labalezitolo ezithengisa okutshiyeneyo ukuba luyakhathazeka ngokuqilibezelwa osokukhanya sokubhahile okwephula umthetho wezokuthengiselana owe Trade Measures Act. Luthi yonke into ethengiswayo kumele ihambelane lalokho okumele ibe yikho njalo kubhalwe ngendlela ecacileyo emaphepheni athengiselwa kiwo isithi ukuphambanisa lokhu yikwephula umthetho okulezijeziso ezinzima kulabo abawephulayo.
UZaya uthi inkinga yikuba inengi lalabo abalokungamafekitali okufihlekileyo kangaka ngabantu abalezikhundla kwezombusazwe abafuna ukuzinothisa masinya ngendlela elula beqila uzulu ovele ezidubekela.