Kuqhamuke ukulwisana kwamapholisa ohlangothi lwe Riot ku Zimbabwe Republic Police, labontanga phose amakhulu amathathu awebandla leMDC-T ngoLwesithathu emini eHarare.
Ontanga laba bebevela edale lephalamende ukuyakwethula umbiko wabo wokukhonona phezu kokunyamalala komkhokheli we Occupy Africa Unity Square, umnumzana Itai Dzamara, ngoMvulo ocatshangelwa ukuba uthunjwe ngabezomthetho njalo engaziwa lapho akhona kuze kube lalamuhla lokhu.
Badibane lamapholisa belubhekise edale lephalamende ukuyakwethula umbiko wabo wokukhonona kumalunga aleli dale ukuthi ababuzele kumphathintambo wezemithetho onguye njalo omunye wabasekeli bakamongameli, umnumzana Emmerson Munangagwa ukuthi ungaphi uDzamara.
Baqhubeke bethi bakubone kufanele ukuthatha lelinyathelo, lokutshengisela ngokuthula bekhonona phezu kokwenza kwabomthetho abehluleka ukwenza umsebenzi wabo sokuvikela uzulu okugoqela uDzamara. Baqonde ephalamende ngenhloso yokukhuthaza amalunga ukuthi aluphathe loludaba edale, benze achaze uMnangagwa ukuthi usiwe ngaphi uDzamara, ngosuku lapho abaphathintambo babuzwa khona imibuzo kuleli dale.
Ontanga bathi okwenzakala eZimbabwe lokhu yinto eyangisayo nxa kukhangelwa ukuba umongameli Robert Mugabe nguye umgcinisihlalo wenhlanganiso eye SADC leye African Union.
Uzulu weHarare obesedolobheni ngesikhathi lokho kusenzakala basole kakhulu lokhu kwenza kwamapholisa amane avukela uzulu ozama ukukhalaza phezu kokungalondolozwa kwelungelo loluntu okubalisa ukuthunjwa kukaDzamara. Omunye walaba bantu ngumnumzana Sibangani Ndlovu. Uthi uNdlovu, ukwenza kwamapholisa lokhu kutshengisa ukuba uhulumende ubafundisa ngendlela engayisiyo, yokusebenzisa udlame sikhathi sonke nxa abantu bethe basebenzisa ilungelo labo lokukhonona ngokutshengisela.
Lesi sehlakalo sokuhlaselwa ngamapholisa kwabontanga senzakale lapho bequma umgwaqo uSecond Street behamba ngNelson Mandela Rd.
Inhlanganiso ezinengi zabalwela ilungelo loluntu ezibalisa eye Human NGO Forum, Heal Zimbabwe, Peace Project, Amnesty International lezinye basole lokhu kwenza kukahulumende bethi yikwephula ilungelo loluntu.
Kuthi abehofisi yommeli weMelika eZimbabwe labo batshengisa insolo yabo phezu kokuthunjwa kukaDzamara bethi yikwephula ilungelo loluntu.
Ngesikhathi loludaba lulotshwa, amapholisa eRiot abe hlomile abehanqe isigodlo seMDC-T abatshayeli labazihambelayo bevinjwa ukudlula kule indawo.
UDzamara unyamalale ngoMvulo esendaweni lapho okugelwa khona inwele lapho abikwa ethunjwe ngamadoda amahlanu abanakanelwa ukuthi ngamapholisa awensitha awe CIO.
Kunjalo nje, lanxa kuke kwaba lehungahunga lokuthi uDzamara usetholakale estokisini se Harare Central amagqwetha ammelayo alandule limbiko esithi kabonakalanga.
Lokhu kulandela eminye njalo imbiko izolo ebisithi kutholakale isidumbu sakhe okulandulwe njalo ngamagqwetha akhe. Lokhu kwenzakala inhlanganiso ezitshiyeneyo lamazwe ambalwa esithi kakhululwe uDzamara lapho angabe efakwe khona.
Uhulumende weleMelika uthi uhulumende kumele enze konke okusemandleni akhe ukuthi abonakale lapho angabe ekhona lokhu wathunjwayo ngoMvulo.
Kuthi uhulumende wakwele Australia laye uthe kumele labo abathumba uDzamara babotshwe bajeziswe.
Kuthi eZimbabwe kulenhlanganiso ezibalisa ezilwela amalungelo kunye lezentathelizindaba lazo esezitshengise ukukhathazeka ngokuthunjwa kuka Dzamara.
Ukuhlaziya loludaba uChris Gande weStudio Seven uxoxe loMnu. Max Mkandla owalwa impi yenkululeko yena othi loludaba nxa lungaphathwanga kahle lungadala umsindo omkhulu.