Ukwabela abasekeli bakamomgameli welizwe ingatsha zikahulumende ukuba bakhokhele abaphathintambo akusoze kuphathise ukuthuthukisa umumo wezomnotho welizwe, kutsho ingcwethi kwezombusazwe.
Abasekeli bakaMugabe, uMnu. Emmerson Mnangagwa lo Mnu. Phelekezela Mphoko bazakuba lamandla okuqondisa lokucebisa ingatsha abazabelweyo ngumongameli Mugabe.
Osaphethe isikhundla sikaMongameli, uMnu. Emmerson Mnangagwa ubikwa liphephandaba le The Herald esithi wabelwe ingatsha ezibalisa olubona ngezokulima, olwezempilakahle, olokwethekekelelwa kwelizwe, olwezemfundo yaphezulu kunye lolwamabhizimusi asacathulayo.
UMphoko yena uzakhangela ingatsha ezibalisa olokulondoloza ukuthula, olubona ngokuthwalwa kwempahla, olubona ngokwakha, olokwethulwa kwemibiko lolokulinganiswa kwamathuba awabesifazane labesilisa.
Kumaviki ambalwa adluleyo uNkosikazi Grace Mugabe utshele imihlangano ayenze lozulu ukuthi obengumsekeli kamongameli, uNkosikazi Joice Mujuru ubengaqhubi kuhle umsebenzi.
Ingcwethi ecubungula ezombusazwe, uMnu. Pedzisayi Ruhanya uthi lelinyathelo alisoze liphathise ngoba lifana lokucomba ixoxo ukuthi libukeke.
Enye njalo ingcwethi, uMnu. Zenzele Ndebele laye uvumelane lo Ruhanya owengezelela esithi inyathelo lika Mugabe kalisoze liphathise ngalutho.
