Kusehlakalo esimangalise uzulu, amapholisa eHarare, avimbe ukutshengisela kwabontanga bebandla le Zanu PF bemanyene labelinye icele lenhlanganiso emela izifundi zemakolitshini lemauniversity, bekhonona phezu kokungathembeki lokungaqhutshwa kuhle komsebenzi lapho okufundelwa khona umsebenzi wokuba ngumbalisi, eBelvedere Technical Teachers’s Training College kanye lokuhlukuluzwa kosaphethe isikhundla somkhokheli waleli kolitshi.
Phose amatshumi amathathu abontanga beZanu PF laba, besekelwa ngolunye uhlangothi lwenhlanganiso yezifundi eye ZICOSU baye e Belvedere Technical Teachers College ngoLwesine ekuseni ukuyatshengisela lanxa bebengayitholanga imvumo yamapholisa ukuba benze lokho.
Ubufakazi obukhona buveza ukuba umgcinisihlalo webandla le Zanu Pf leli esigabeni se Harare, u Ambassador Amos Midzi, ubexwayise ontanga laba ngaphambilini ukuba behlukane lokutshengisela lokhu lanxa laye engazange anikeze isizatho.
Engcwadini yabo yokwazisa uMidzi njengomgcinisihlalo phezu kwenhloso yabo, baveze ukuba kabasayi kutshengisela njengokuxwayisa kwakhe kodwa bathi sebezayahlangana labanye babo babanikeze lowo mlayezo ,wokubalisa ukuqhubekela phambili ngokutshengisela.
Kodwa baqhubekele phambili bethi bafuna ukuyanikeza incwadi yezikhalazo edale lephalamende kanye lakumphathintambo wemfundo yaphezulu, unkosikazi Olivia Muchena.
Behluleke ukutshengisela njengokutsho kwawo amapholisa ebevele ebalele izolo kusicelo sabo sokuba benze lokho, bathola amapholisa wohlangothi lwe Riot ehlomile esebalindile.
Okumangalise intathelizindaba ebezikhona kulesi sehlakalo yikuba akekho otshayiweyo njengalokho okuvame ukwenzakala nxa ontanga be MDC besenza okufanayo, bamane baxotshwa nje.
I Studio Seven ikhulumisane lenkokheli yabontanga be Zanu Pf okubalisa umnumzana Abraham Samushonga yena ongumgcinisihlalo we District kanye lomnumzana Richard Butros Samunda unobhala obona ngenhlelo, bethi bakubone kufanele ukuba batshengisele bekhonona phezu kokungathembeki lokuhlukuluzwa kosaphethe isikhundla sokukhokhela leli kolitshi le Belvedere, umnumzana Patrick Chinhoro.
Bobabili bathi njengamalunga ebandla, bangeke babukela omunye wabo ofana lo Chinhoro ehlukuluzwa yikho bebefuna ukutshengisela.
Kodwa olunye uhlangothi lwabamela izifundi zemakolitshini lemauniversity, enhlanganisweni ye Zimbabwe National Association for Student Unions – ZINASU batshengise ukusola ukwenza kwabontanga beZanu Pf.
Bathi kumele kube zinhlanganiso zezifundi njengabo, okumele kube yizo ezikhokhela ekutshengiseleni kukhankaselwa okuphathelane lokulondolozwa kwelungelo lazo hatshi bethi ngoba iBelvedere Teachers College ingeyezifundi hatshi abezombusazwe.
Kunxoxo lokhokhela linhlanganiso ye ZINASU, okwakhathesi umnumzana Gilbert Mutubuki, uthi lesi yisibonelo sokwenzakala kuhulumende lasebandleni le Zanu Pf eselililamaqembu amanengi phakathi kwalo.
Lokhu kusolwe njalo ngowake waphatha isikhundla sinye kuZINASU umnumzana Pride Mkono ngesikhathi ekhulumisana leStudio Seven ecingweni, ethi ngoba kungamelanga kube ngabezombusazwe abakhokhela indaba zokutshengisela ngokuphathelene lendaweni zokufundela okubalisa amakolitshi ababalisi.
Uphinde wasola lokuphatheka kwabenhlanganiso yeZimbabwe College Of Students Union- ZICOSU, yona ehlezi izibalela njengo hlangothi lwebandla leZanu Pf.
I Studio Seven kayisanelisanga ukukhulumisana lamapholisa kanye labe ZICOSU ukuze izwe umbono wabo phezu kwalokhu kutshengisela.
Lokhu ngokwesibili phakathi kwayonale iviki, kuvinjwa ontanga beZanu Pf ukutshengisela phezu kwabakusolayo ebandleni labo.
Ngomvulo kuyonale iviki,amapholisa avimbe abopha ukutshengisela obekuqoqwe ngabebandla linye le Zanu Pf esigabeni seHarare South lapho ontanga bekhonona phezu kwenkokheli kuleso sigaba.
Engcwadini yakhe yokubavimba kulokho kutshengisela, ethengiswe abe Studio Seven, uCommanding Harare Central Police, uChief Suprintendant Officer Nobert Saunyama uveze ukuba kababavumeli labontanga ukutshengisela okwamanje umumo uze ubengcono.