Abenhlanganiso yamabandla abona ngentuthuk yabatsha, eye National Association of Youth Organisations (NAYO) bathi uhulumende kanye lamabandla ezombusazwe sokumele bahlale phansi bakhulimisane.
Abasakhulayo bathi lokhu kuzakwenza kudingwe indlela zokuqeda ukufuthelana okuselizweni okungakhokhelela ekuqhamukeni kodlakela olubi eZimbabwe ngemva kokhetho lwangeviki edluleyo.
Abasakhulayo laba baveze imibono yabo le, emhlanganweni lentathelizinda eHarare.
Umkhokheli wale inhlanganiso uMnu. Misheck Gondo uthi le yimibono hatshi eyamalunga enhlanganiso yakhe kuphela kodwa inengi labasakhulayo elizweni asebebona elakusasa labo lsiba mnyama ngokufuthelana okuselizweni.
UGondo uthe kuqakathekile ukuthi inkokheli zikhumisane umlotha kulokuthi ziqakathekise ukulwela ukuthi ngubani oyinkunzi.
“Uhulumende ozayo, ozabe ekhokhela ilizwe leli okweminyaka elandelayo kufuze alalele lokhu esikukhulumayo njalo alungisise udaba lolu oluhluphayo. Lokhu sikwenzela ukuthi ilizwe libelokuthula njalo ukukhulumelana kufuze kuqakathekiswe ekwenzeni konke lokhu”.
Isikhulumeli senhlanganiso yabafundi eye Zimbabwe National Students Union (ZINASU), uMnu. Tatenda Mandondo obikwa edingwa ngamapholisa labe Central Intelligence Organisation (CIO) uthe okwakhathesi kumele kube lokukhulumelana njengoba ukuletha amasotsha edolobheni lokutshengisela sokufaka umphakathi engozini njalo kungeke kwalungisa okuhluphayo.
“Okwakhathesi sikhala ngokuthi abantu bekhulumelane ngoba sikhangele akula okuzalethwa ludlakela olukhona. Abantu abasoze bazwisisane njalo akusoze kusincede ngalutho ukuthi abantu betshengisele amasotsha ababulale, abanye becine bebotshwa ngenxa yokusebenzisa amalungelo abo. Ngibona ukukhulumelana kuyiyo yodwa indlela esingahamba ngayo”.
Omunye wabasakhulayo owenhlanganiso ye LNYB njalo elilunga le ZINASU, uMnu. Samuel Gwenzi uthi akubaphathi kuhle abakubona sokusenzakala ngemva kokhetho osekusethusa abasakhulayo inengi labo eselihlala licatshile lisesaba amasotsha asenyakazela ndawana yonke eHarare.
“Sifuna ukukhangela umthetho wokhetho sisiya phambili. Siphatheke kakhulu ngodaba lodlakela olubekhona ngemva kokhetho ngenxa yamapholisa lamasotsha oselwenze inengi labatsha ababesenza ezombusazwe becatshe. Yikho icela bezame ukungasebenzisi amandla ukuze ilizwe lethu libuyele libe ngelokuthula”.
Ngemva kodlakela olube khona eHarare abantu betshengisela besola ikhomishini ebona ngezokhetho eye Zimbabwe Electoral Commission (ZEC) ukuthi iyaphuza ukwethula impumela yokhetho lokudinga umongameli, amasotsha asolwa ngokusebenzisa ucuku emizameni yokuvimba umvukela ongenziwa ngabantu njalo abikwa esehamba emalokitshini etshaya izakhamizi.
Kunje amalunga enhlanganiso zabasakhulayo ezigoqela oZINASU lezinye, agoqela umongameli walinhlanganiso uArchibold Madida lonobhala jikelele uAshleigh Pfunye badingwa ngamapholisa, amasotsha labeCIO. Ngokunjalo lamalunga enhlanganiso yabasakhulayo eye Generational Consensus, uOstallos Siziba lo Makomborero Haruzivishe.
Isiphathamandla somanyano wamabandla aphikisayo, oweMDC Alliance, uMnu. Tendai Biti ubikwa eke wazama ukubotshwa ngoLwesithathu ebalekela amapholisa kodwa eminye imibiko ithi akazange abotshwe kodwa abantu makhaza yibo abakade befuna ukumbopha kwaze kwalamula amapholisa akwele Zambia.
